اسلام آباد / تهران: وفاقي گهرو وزير محسن نقوي 24 ڪلاڪن اندر ٻيهر اهم دوري تي ايران جي گادي واري شهر تهران پهچي ويو آهي، جتي هو آمريڪا ۽ ايران وچ ۾ ممڪن ڳالهين ۽ خطي جي تازي صورتحال بابت ايراني قيادت سان ملاقاتون ڪندو.
ذريعن موجب محسن نقوي پنهنجي دوري دوران ايران جي اعليٰ سياسي ۽ سفارتي اڳواڻن سان ملاقاتون ڪري آمريڪا ـ ايران لاڳاپن، وچ اوڀر جي صورتحال ۽ امن ڳالهين جي امڪانن تي خيالن جي ڏي وٺ ڪندو.
ياد رهي ته ڪجهه ڏينهن اڳ به وفاقي گهرو وزير ايران جو دورو ڪيو هو، جتي هن ايراني صدر مسعود پزشڪيان، پارليامينٽ جي اسپيڪر ۽ اهم مذاڪراتي اڳواڻ محمد باقر قاليباف ۽ ايراني پرڏيهي وزير عباس عراقچي سان الڳ الڳ ملاقاتون ڪيون هيون.
سفارتي ذريعن موجب انهن ملاقاتن دوران پاڪستان ۽ ايران جي ٻطرفن لاڳاپن، سرحدي معاملن، علائقائي امن ۽ وچ اوڀر ۾ وڌندڙ ڇڪتاڻ بابت تفصيلي ڳالهيون ٿيون هيون. ذريعن جو چوڻ آهي ته پاڪستان علائقي ۾ تڪرار گهٽائڻ ۽ ڳالهين وسيلي مسئلا حل ڪرڻ جي حمايت جاري رکي رهيو آهي.
محسن نقوي جي مختصر عرصي اندر ٻيهر تهران پهچڻ کي سفارتي حلقا انتهائي اهم قرار ڏئي رهيا آهن. ماهرن موجب پاڪستان هن وقت خطي ۾ وڌندڙ غيريقيني صورتحال سبب سرگرم سفارتڪاري ڪري رهيو آهي ته جيئن ايران ۽ آمريڪا وچ ۾ ڇڪتاڻ وڌيڪ نه وڌي.
سياسي تجزيه نگارن جو چوڻ آهي ته پاڪستان هميشه ايران ۽ آمريڪا وچ ۾ سفارتي حل جي حمايت ڪندو رهيو آهي، ڇو ته وچ اوڀر ۾ ڪنهن به وڏي تڪرار جا اثر پاڪستان سميت سڄي علائقي تي پئجي سگهن ٿا.
ذريعن موجب محسن نقوي پنهنجي اڳوڻي ايران دوري کان پوءِ سڌو بلوچستان پهتو هو، جتي وزيراعظم شهباز شريف ۽ فيلڊ مارشل عاصم منير پڻ موجود هئا. ان ملاقات دوران به علائقائي سلامتي ۽ موجوده صورتحال بابت اهم صلاح مشورا ٿيڻ جون خبرون سامهون آيون هيون.
پاڪستان ۽ ايران وچ ۾ ڊگهي سرحد ۽ ويجها لاڳاپا هجڻ سبب ٻنهي ملڪن لاءِ علائقائي امن ۽ استحڪام وڏي اهميت رکي ٿو. پاڪستان بار بار زور ڏيندو رهيو آهي ته سڀئي تڪرار ڳالهين، سفارتڪاري ۽ امن ذريعي حل ٿيڻ گهرجن.
هن تازي دوري کي به علائقي ۾ سفارتي سرگرمين جو اهم حصو سمجهيو پيو وڃي، جڏهن ته ايران ۽ آمريڪا وچ ۾ ممڪن ڳالهين بابت عالمي سطح تي به ڌيان وڌي رهيو آهي.
