عالمي ماحولياتي ڏينهن: سيپا پاران ڄامشورو ۽ مٽياري ۾ وڻڪاري مهم، آگاهي سيمينار ۽ واڪ منعقد

حيدرآباد 7 جون عالمي ماحولياتي ڏينهن جي مناسبت سان سنڌ انوائرنمينٽل پروٽيڪشن ايجنسي (سيپا) ضلعي آفيس ڄامشورو پاران ماحوليات جي تحفظ ۽ وڻڪاري جي واڌاري لاءِ مختلف تقريبن ۽ وڻڪاري مهم جو اھتمام ڪيو ويو، ڄامشورو، سائيٽ ڪوٽڙي ۽ يو ايس پاڪستان سينٽر فار ايڊوانسڊ اسٽڊيز اِن واٽر (USPCAS-W) مهراڻ يونيورسٽي سميت مختلف هنڌن تي نم ۽ ٻين قسمن جا ٻوٽا پوکيا ويا،
عالمي ماحولياتي ڏينهن جي حوالي سان سيپا ڄامشورو پاران آرڪروما جي سهڪار سان مهراڻ يونيورسٽي ۾ هڪ تقريب پڻ منعقد ڪئي وئي جتي وڻڪاري مھم ۽ ماحولياتي آگاهي سيشنز جو اهتمام ڪيو ويو، تقريب جو مقصد ماحوليات جي تحفظ، پائيدار ترقي ۽ ماحول دوست قدمن بابت شعور اجاگر ڪرڻ هو، ان موقعي تي سيپا ڄامشورو جي ضلعي انچارج ۽ ڊپٽي ڊائريڪٽر قطب الدين درس چيو تہ ادارو ماحوليات جي تحفظ، آلودگي جي خاتمي ۽ سرسبز ماحول جي فروغ لاءِ پنهنجون ڪوششون جاري رکندو، هن چيو تہ وڻ فضائي آلودگي جي خاتمي، موسمياتي تبديلين جي اثرن ۾ گهٽتائي ۽ انساني صحت جي تحفظ ۾ اهم ڪردار ادا ڪن ٿا، هن وڻڪاري کي هر فرد جي سماجي ذميواري قرار ڏنو، آرڪروما جي نمائندن ٻڌايو ته ڪمپني پنهنجي صنعتي سرگرمين ۾ ماحول دوست پاليسين تي عمل پيرا آهي ۽ ماحول تي ناڪاري اثر گهٽائڻ لاءِ مختلف قدم کڻي رهي آهي، آرڪروما جي نمائندي ساجد جوڻيجو چيو تہ ماحوليات جو تحفظ گڏيل ذميواري آهي ۽ آرڪروما ان مقصد لاءِ پنهنجون ڪوششون جاري رکندي، هن وڻڪاري ۽ ماحولياتي ذميوارين کي ڪمپني جي اهم ترجيح قرار ڏنو، وڻڪاري مهم ۾ هيلين فارما پڻ سھڪار ڪيو ۽ ڄامشورو سميت سائيٽ ڪوٽڙي ۾ ٻوٽا پوکيا، اداري جي نمائندن ماحول دوست سرگرمين ۽ سماجي ذميوارين لاءِ پنهنجي عزم جو اظهار ڪيو، مھم ۾ سرڪاري آفيسرز، سول سوسائٽي جي نمائندن ۽ شاگردن شرڪت ڪئي ۽ ٻوٽن جي سار سنڀال جو عزم ورجايو، آگاهي سيشنز دوران شرڪت ڪندڙن کي وڻن جي اهميت، ماحولياتي آلودگي ۽ موسمياتي تبديلين بابت معلومات فراهم ڪئي وئي، ٻئي طرف مٽياري ۾ چائنا هيلٿ ليبارٽري جي سھڪار سان آگاهي واڪ جو انعقاد ڪيو ويو، واڪ شاهي بازار کان شروع ٿي مٽياري پريس ڪلب تي اختتام پذير ٿي، آگاهي واڪ ۾ شاگردن، سول سوسائٽي جي نمائندن، سرڪاري آفيسرز ۽ شهرين جي وڏي انگ شرڪت ڪئي، شرڪت ڪندڙن ماحول جي تحفظ ۽ موسمياتي تبديلين کي منهن ڏيڻ لاءِ گڏيل ڪوششن جي ضرورت تي زور ڏنو، ان موقعي تي سيپا مٽياري جي ضلعي انچارج قطب الدين درس خطاب ڪندي چيو تہ ماحولياتي تحفظ اسان سڀني جي گڏيل ذميواري آهي، هن شهرين تي زور ڏنو تہ آلودگي جي خاتمي، قدرتي وسيلن جي تحفظ ۽ ماحول دوست طرزِ زندگي کي هٿي وٺرائڻ ۾ پنهنجو ڪردار ادا ڪن، سيپا جي ڪيمسٽ ڊاڪٽر محمد علي پنهنجي خطاب ۾ پاڻي ۽ هوا جي آلودگي، ڪچري جي غير مناسب نيڪال ۽ نقصانڪار ڪيميائي مادّن جي استعمال جي نقصانن تي روشني وڌي، سيپا ضلعي آفيس مٽياري ان عزم جو ورجاءُ ڪيو تہ ماحول دوست سرگرمين ۽ عوامي آگاهي مهم ذريعي ماحولياتي تحفظ جي عالمي پيغام کي مقامي سطح تي هٿي ڏني ويندي.