ڪراچي: ميئر ڪراچي مرتضيٰ وهاب واٽر ٽينڪرن جي سڃاڻپ ۽ نگراني لاءِ نئون بارڪوڊ ٽريڪنگ سسٽم متعارف ڪرائڻ جو اعلان ڪيو آهي.
هن هڪ وڊيو پيغام ۾ چيو ته هاڻي آساني سان معلوم ڪري سگهجي ٿو ته پاڻي فراهم ڪندڙ ڪهڙو ٽينڪر قانوني آهي ۽ ڪهڙو غير قانوني. شهرين کي رڳو پنهنجي موبائل فون سان واٽر ٽينڪر تي لڳل بارڪوڊ اسڪين ڪرڻو پوندو.
بارڪوڊ اسڪين ڪرڻ سان ٽينڪر، ڊرائيور، مقرر ٿيل روٽ، گاڏي جي فٽنيس ۽ پاڻي جي فراهمي واري ذريعي بابت مڪمل تفصيل سامهون اچي ويندي. هر رجسٽرڊ ٽينڪر جي سڃاڻپ، ڊرائيور جي تصوير ۽ سڃاڻپ وارن تفصيلن جي به بارڪوڊ ذريعي آساني سان تصديق ڪري سگهجي ٿي.
ميئر موجب هي بارڪوڊ ٽريڪنگ سسٽم غير قانوني واٽر ٽينڪر مافيا جي خاتمي لاءِ متعارف ڪرايو ويو آهي. هن شهرين کي اپيل ڪئي ته هو پنهنجي گهر ايندڙ هر واٽر ٽينڪر جو بارڪوڊ ضرور اسڪين ڪري ان جي قانوني حيثيت جي تصديق ڪن.
هن وڌيڪ چيو ته هن نظام جو مقصد غير رجسٽرڊ ٽينڪرن جي نشاندهي ڪرڻ ۽ شهر ۾ پاڻي جي فراهمي جي نظام ۾ شفافيت آڻڻ آهي، جنهن سان قانوني ۽ غير قانوني واٽر ٽينڪرن جي سڃاڻپ هاڻي انتهائي آسان ٿي وئي آهي.
