وارهه: آءِ بي اي پاس 40 پلس اميدوارن جو آفر آرڊر نه ملڻ خلاف احتجاجي سلسلو اڃا تائين جاري آهي.
احتجاج ڪندڙ اميدوار هٿن ۾ پلي ڪارڊ کڻي وارهه پريس ڪلب پهتا، جتي هنن زوردار نعريبازي ڪندي پنهنجي مطالبن جي حق ۾ احتجاج رڪارڊ ڪرايو.
احتجاج جي اڳواڻي ڪندڙ اميدوارن اعجاز تنيو، خادم تنيو، مدثر باريجو، ضمير ٽوٽاڻي ۽ طارق لاشاري ميڊيا سان ڳالهائيندي چيو ته هو گذريل هڪ سال کان آفر آرڊر جاري نه ٿيڻ سبب سراپا احتجاج آهن.
هنن ٻڌايو ته سنڌ اسيمبلي جي هلندڙ اجلاس دوران ايم پي اي جميل احمد سومرو جي اپيل تي سندن مسئلي جي حل لاءِ هڪ خاص (اسپيشل) ڪاميٽي جوڙي وئي، جنهن جو هڪ اجلاس ٿي چڪو آهي، پر ٻيو ۽ فيصلائتو اجلاس گهرائڻ ۾ غيرضروري دير ڪئي پئي وڃي.
احتجاج ڪندڙن مطالبو ڪيو ته اسپيشل ڪاميٽي جو ٻيو ۽ فيصلائتو اجلاس جلد کان جلد ڪوٺائي، سڄي سنڌ ۾ اوور ايج ٿيل نياڻين ۽ نوجوانن کي روزگار ۾ ايڊجسٽ ڪرڻ بابت نوٽيفڪيشن جاري ڪيو وڃي، جيئن سندن هڪ سال جي انتظار جو ازالو ٿي سگهي.
