اسلام آباد: جماعت اسلامي پاڪستان جي امير حافظ نعيم الرحمان چيو آهي ته آزاد ڪشمير جي موجوده صورتحال انتهائي ڳڻتي جوڳي آهي، جڏهن ته هاڻي هڪ اهڙي اميد پيدا ٿي آهي جو ڳالهين ذريعي مسئلي جو حل ڳولي سگهجي ٿو.
حافظ نعيم الرحمان اسلام آباد ۾ جمعيت علماءِ اسلام (ف) جي سربراهه مولانا فضل الرحمان جي رهائشگاهه تي ساڻس ملاقات ڪئي. ملاقات ۾ جماعت اسلامي جي وفد پڻ شرڪت ڪئي، جنهن دوران آزاد ڪشمير جي صورتحال ۽ ٻين اهم معاملن تي خيالن جي ڏي وٺ ڪئي وئي.
ملاقات کان پوءِ ميڊيا سان ڳالهائيندي حافظ نعيم الرحمان چيو ته هو جماعت اسلامي جي وفد سان گڏ مولانا فضل الرحمان سان ملاقات لاءِ آيا آهن، ڇو ته آزاد ڪشمير جي موجوده صورتحال تشويشناڪ آهي ۽ ان جو پرامن حل ڳولڻ وقت جي اهم ضرورت آهي.
هن چيو ته ڪشمير جي معاملي تي هاڻي ڳالهين جي هڪ اميد پيدا ٿي آهي ۽ حڪومت کي اڳتي وڌي باضابطه ڳالهين جو عمل شروع ڪرڻ گهرجي. سندس چوڻ هو ته سڀني اسٽيڪ هولڊرن کي انهن ڌرين کي اهميت ڏيڻ گهرجي، جيڪي ڳالهين ذريعي مسئلن جو حل ڳولڻ لاءِ تيار آهن.
حافظ نعيم الرحمان واضح ڪيو ته اهڙي ڪنهن به معاملي تي ڳالهه ٻولهه نه ٿي سگهي ٿي، جيڪو پاڪستان جي آئين جي خلاف هجي.
ان موقعي تي مولانا فضل الرحمان چيو ته حافظ نعيم الرحمان جي ڳالهه دراصل سڀني جي گڏيل آواز آهي. هن ٻڌايو ته هڪ وفد وٽن خط کڻي آيو ۽ ثالثي جي پيشڪش ڪئي، جنهن تي هن لانگ مارچ ملتوي ڪرڻ جو مشورو ڏنو. سندس چوڻ هو ته ان کان پوءِ لانگ مارچ ملتوي ڪيو ويو ۽ وڌيڪ ڪو قدم نه کنيو ويو، جڏهن ته هاڻي ٻنهي طرفن جي جواب جو انتظار ڪيو پيو وڃي.
مولانا فضل الرحمان چيو ته پاڪستان ۽ آزاد ڪشمير جي سموري سياسي قيادت موجوده صورتحال تي ڳڻتي جو اظهار ڪري رهي آهي. هن چيو ته حڪومت جو چوڻ آهي ته لاڳاپيل ڌر جا مطالبا به مڃيا ويا ۽ معاهدا به ڪيا ويا، پر ان کان پوءِ ساڳي ڌر کي ڪالعدم پڻ قرار ڏنو ويو، جنهن سبب صورتحال وڌيڪ پيچيده ٿي وئي.
هن زور ڀريندي چيو ته مسئلن جو حل صرف طاقت جي بنياد تي فيصلا ڪرڻ بدران دانائي، بردباري ۽ ڳالهين ذريعي ڳولڻ گهرجي، ڇاڪاڻ ته اهڙو طريقو ئي پائيدار امن ۽ استحڪام جو ضامن بڻجي سگهي ٿو.
