ٽنڊوڄام (محبوب حسين بوزدار): سنڌ زرعي يونيورسٽي ٽنڊوڄام جي انتظاميا پوسٽ گريجوئيشن ڊگري پروگرامن ۾ داخلا لاءِ درخواستون جمع ڪرائڻ جي آخري تاريخ ۾ واڌ جو اعلان ڪيو آهي، جنهن تحت هاڻي اميدوار 9 جولاءِ 2026 تائين پنهنجا داخلا فارم جمع ڪرائي سگهندا.
يونيورسٽي جي ڊائريڪٽوريٽ آف ايڊوانسڊ اسٽڊيز پاران جاري ڪيل پڌرائي موجب، ايم ايس سي، ايم ايس آءِ ٽي، ايم اِي، ايم فل ۽ پي ايڇ ڊي پروگرامن ۾ داخلا لاءِ فارم جمع ڪرائڻ جي آخري تاريخ اڳ مقرر ڪيل شيڊيول مان وڌائي 9 جولاءِ 2026 ڪئي وئي آهي.
ترجمان موجب، داخلا جي خواهشمند شاگردن ۽ شاگردياڻين جي سهولت کي نظر ۾ رکندي اها واڌ ڪئي وئي آهي، جيئن وڌيڪ اميدوار مقرر مدي اندر پنهنجون درخواستون جمع ڪرائي سگهن ۽ اعليٰ تعليم حاصل ڪرڻ جو موقعو ماڻي سگهن.
پڌرائي ۾ وڌيڪ ڄاڻايو ويو آهي ته لاڳاپيل پوسٽ گريجوئيشن ڊگري پروگرامن لاءِ انٽري ٽيسٽ 14 جولاءِ 2026 تي منعقد ڪئي ويندي، جنهن ۾ صرف اهي اميدوار شرڪت ڪري سگهندا، جن مقرر ڪيل تاريخ تائين پنهنجا درخواست فارم مڪمل ڪري جمع ڪرايا هوندا.
يونيورسٽي انتظاميا سڀني خواهشمند اميدوارن کي هدايت ڪئي آهي ته هو آخري تاريخ جو انتظار ڪرڻ بدران وقت سر پنهنجا فارم جمع ڪرائين ۽ داخلا جي عمل بابت وڌيڪ معلومات لاءِ يونيورسٽي جي لاڳاپيل شعبن يا سرڪاري ذريعن سان رابطو ۾ رهن.
انتظاميا موجب، پوسٽ گريجوئيشن پروگرامن ۾ داخلا ميرٽ جي بنياد تي ڏني ويندي، جڏهن ته انٽري ٽيسٽ ۾ ڪاميابي ۽ ٻين مقرر ڪيل شرطن کي پورو ڪندڙ اميدوارن کي داخلا جي ايندڙ مرحلن لاءِ اهل قرار ڏنو ويندو. يونيورسٽي اميد ظاهر ڪئي آهي ته تاريخ ۾ واڌ سان وڌيڪ شاگردن کي اعليٰ تعليم جا بهتر موقعا حاصل ٿيندا.
