اسلام آباد: آن لائين حج پورٽل تي رجسٽريشن جو انگ ڏيڍ لک کان وڌي ويو آهي، جڏهن ته وفاقي حڪومت حج جي رجسٽريشن کان وٺي ادائيگي تائين سڄي عمل کي مڪمل طور ڊجيٽل بڻائڻ جو اعلان ڪيو آهي.
مذهبي معاملن واري وزارت موجب وزيراعظم جي هدايتن تي حج واجبات جي آن لائين ادائيگي لاءِ نئون نظام تيار ڪيو ويو آهي، جنهن تحت ون لنڪ (1LINK) ذريعي ملڪ اندر ويٺي آساني سان حج جا واجبات جمع ڪرائي سگهبا.
وزارت جي ترجمان چيو آهي ته نئين ڊجيٽل نظام سان حاجين کي بئنڪن جا غيرضروري چڪر نه لڳائڻا پوندا، ڇو ته رجسٽريشن، ادائيگي ۽ ٻين لاڳاپيل مرحلن کي جديد ٽيڪنالاجي سان ڳنڍيو ويو آهي.
ترجمان موجب حج جو پورو نظام رجسٽريشن کان وٺي ادائيگي تائين ڊجيٽل هوندو، جنهن سان شفافيت، سهولت ۽ تيزي کي هٿي ملندي. ان سان گڏ درخواستن جي پروسيسنگ به وڌيڪ منظم ۽ آسان بڻجي ويندي.
وزارت وڌيڪ ٻڌايو ته پرڏيهه ۾ رهندڙ پاڪستاني به هن سهولت مان فائدو وٺي سگهندا. هو دنيا جي ڪنهن به ملڪ مان آن لائين حج رجسٽريشن ڪرائڻ سان گڏ گهر ويٺي پنهنجي حج جا واجبات به جمع ڪرائي سگهندا، جنهن سان کين پاڪستان اچڻ يا ڪنهن نمائندي وسيلي ڪارروائي ڪرائڻ جي ضرورت نه پوندي.
اختيارين موجب ڊجيٽل نظام متعارف ڪرائڻ جو مقصد حج جي درخواستن جي عمل کي وڌيڪ آسان، تيز ۽ شفاف بڻائڻ آهي، جيئن ملڪ اندر ۽ ٻاهر رهندڙ پاڪستانين کي جديد سهولتون فراهم ڪري سگهجن.
مذهبي معاملن واري وزارت اميد ظاهر ڪئي آهي ته آن لائين پورٽل ۽ ڊجيٽل ادائيگي واري نظام سان وڌيڪ ماڻهو آساني سان رجسٽريشن ڪرائي سگهندا ۽ حج جي سموري عمل دوران کين بهتر سهولتون حاصل ٿينديون. وزارت موجب آن لائين رجسٽريشن ۾ تيزي سان ٿيندڙ واڌ ان ڳالهه جو ثبوت آهي ته عوام ڊجيٽل سهولتن تي اعتماد ڪري رهيو آهي ۽ جديد نظام کي ڀرپور موٽ ملي رهي آهي.
