ڪاراڪاس: وينزويلا ۾ گذريل هفتي آيل طاقتور زلزلن کان پوءِ فوتين جي انگ بابت ڳڻتي وڌي وئي آهي، جتي گڏيل قومن ۽ ٻين ادارن خدشو ظاهر ڪيو آهي ته جاني نقصان 10 هزار يا ان کان به وڌيڪ ٿي سگهي ٿو.
رپورٽن موجب، وينزويلا ۾ 7.2 ۽ 7.5 شدت جا ٻه شديد زلزلا آيا، جن ڪيترن ئي علائقن ۾ وڏي پيماني تي تباهي آندي. رهائشي عمارتون، روڊ، پل ۽ ٻيون بنيادي سهولتون متاثر ٿيون، جڏهن ته ڪيترائي ماڻهو اڃا تائين ملبي هيٺ ڦاٿل هجڻ جو خدشو آهي.
گڏيل قومن جي عملدارن موجب، ممڪن وڏي انگ ۾ فوتين کي نظر ۾ رکندي 10 هزار لاشن لاءِ باڊي بيگز (لاشن جا ٿيلها) حاصل ڪرڻ جون تياريون ڪيون پيون وڃن، جيئن امدادي ۽ ريسڪيو ڪاررواين دوران ضروري انتظام موجود هجن.
ٻئي طرف آمريڪي جيولوجيڪل سروي (USGS) پڻ پنهنجي ابتدائي جائزي ۾ خدشو ظاهر ڪيو آهي ته زلزلي سبب فوتين جو انگ 10 هزار کان هڪ لک جي وچ ۾ ٿي سگهي ٿو، جڏهن ته حتمي انگ اکر ريسڪيو ۽ جاچ مڪمل ٿيڻ کان پوءِ ئي سامهون اچي سگهندا.
امدادي ٽيمون، مقامي اختيارين ۽ بين الاقوامي ادارا متاثر علائقن ۾ ڳولا ۽ بچاءَ جون ڪارروايون جاري رکيو ويٺا آهن، جڏهن ته زخمين کي طبي امداد فراهم ڪرڻ ۽ بي گهر ٿيل ماڻهن لاءِ عارضي رهائش جو بندوبست پڻ ڪيو پيو وڃي.
نوٽ: مٿين انگ اکر شروعاتي خدشن ۽ لاڳاپيل ادارن جي ابتدائي اندازن تي ٻڌل آهن، حتمي فوتين جو انگ جاچ ۽ امدادي ڪاررواين جي مڪمل ٿيڻ کان پوءِ ئي واضح ٿي سگهندو.
