بدين وارڊ نمبر 8 جي ڦل کاڻ ۾ برسات جو گندو پاڻي بيهڻ سبب مڇرن جو آزار، معصوم ٻار الٽي ۽ دست جي بيمارين ۾ مبتلا

بدين ڊ ر محفوظ شاه
بدين وارڊ نمبر 8 جي ڦل کاڻ ۾ برسات جو گندو پاڻي بيهڻ سبب مڇرن جو آزار، معصوم ٻار الٽي ۽ دست جي بيمارين ۾ مبتلا
بدين: وارڊ نمبر 8 جي علائقي ڦل کاڻ ۾ برسات جو گندو پاڻي نيڪال نه ٿيڻ سبب رهواسي سخت پريشانين کي منهن ڏئي رهيا آهن، جڏهن ته بيٺل گندي پاڻي سبب مڇرن جو آزار وڌي ويو آهي. علائقي جي رهواسين موجب ننڍڙا ٻار الٽي، بخار ۽ دست جهڙين بيمارين ۾ مبتلا ٿي رهيا آهن.
ان موقعي تي دلدار عمراڻي صحافين سان ڳالهائيندي چيو ته مسجد الله جو گهر آهي، پر گهڻي وقت کان مسجد ڀرسان پاڻي بيهڻ سبب مسجد جي بنيادن کي نقصان پهچي رهيو آهي، جنهن ڪري مسجد جي عمارت کي خطرو پيدا ٿيڻ جو خدشو آهي.
هن وڌيڪ چيو ته ڦل کاڻ جي پاڻي جي نيڪال واري رستي تي بااثر ماڻهن مبينا طور غيرقانوني اڏاوتون ڪري نيڪال جو رستو بند ڪري ڇڏيو آهي، جنهن سبب گندو پاڻي نيڪال ٿيڻ بدران علائقي ۾ بيٺل رهي ٿو.
وارڊ نمبر 8 جي رهواسين احتجاج ڪندي ڊپٽي ڪمشنر بدين ۽ لاڳاپيل اختيارين کان مطالبو ڪيو آهي ته معاملي جو فوري نوٽيس وٺي، نيڪال جو رستو بحال ڪرايو وڃي، بيٺل گندي پاڻي جي نيڪال لاءِ ترت قدم کنيا وڃن ۽ علائقي واسين کي صحت جي مسئلن ۽ ٻين پريشانين کان ڇوٽڪارو ڏياري انصاف فراهم ڪيو وڃي.