ڪراچي: ملڪ ۾ سون جي قيمتن ۾ نمايان گهٽتائي رڪارڊ ڪئي وئي آهي، جنهن کان پوءِ في تولي سون جي قيمت ۾ 4,100 رپين جي لاٿ اچي وئي آهي.
آل پاڪستان جيمز اينڊ جيولرز ايسوسيئيشن موجب، تازي گهٽتائي کان پوءِ في تولو سون 4 لک 24 هزار 836 رپين ۾ وڪرو ٿي رهيو آهي.
ايسوسيئيشن موجب، 10 گرام سون جي قيمت ۾ به 3,515 رپين جي گهٽتائي ٿي آهي، جنهن کان پوءِ ان جي نئين قيمت 3 لک 64 هزار 228 رپيا ٿي وئي آهي.
هوڏانهن عالمي مارڪيٽ ۾ پڻ سون جي اگهن ۾ گهٽتائي ڏسڻ ۾ آئي آهي. عالمي واپاري انگن اکرن موجب، سون جي في اونس قيمت 41 آمريڪي ڊالر گهٽجي 4,024 ڊالر ٿي وئي آهي.
ماهرن موجب، عالمي مارڪيٽ ۾ سون جي قيمتن ۾ ٿيندڙ لاٿ جو سڌو اثر پاڪستان جي مقامي مارڪيٽ تي پڻ پيو آهي، جنهن سبب ملڪ ۾ سون جي اگهن ۾ نمايان گهٽتائي آئي آهي.
سون جي واپارين جو چوڻ آهي ته عالمي مارڪيٽ جي صورتحال، ڊالر جي مٽاسٽا جي شرح ۽ مقامي طلب موجب ايندڙ ڏينهن ۾ سون جي قيمتن ۾ وڌيڪ تبديلي جو امڪان پڻ موجود آهي.
