نوشهروفيروز (رپورٽ): نوشهروفيروز جي عدالت ۾ پسند جي شادي ڪندڙ هڪ جوڙي پنهنجي جان کي خطرو هجڻ جو دعويٰ ڪندي سنڌ حڪومت ۽ قانون لاڳو ڪندڙ ادارن کان تحفظ فراهم ڪرڻ جي اپيل ڪئي آهي.
درياخان واسي نثار احمد مري ۽ ضلعي خيرپور جي علائقي پير وسن سان تعلق رکندڙ بينظير پهل نوشهروفيروز جي عدالت ۾ قانوني طور نڪاح ڪرڻ کان پوءِ پريس ڪلب نوشهروفيروز پهتا، جتي هنن ميڊيا سان ڳالهائيندي پنهنجي موقف پيش ڪيو.
نثار احمد مري ۽ بينظير پهل چيو ته هنن شريعت محمدي ۽ قانون موجب عدالت ۾ نڪاح ڪيو آهي، جيڪو مڪمل طور قانوني آهي.
بينظير پهل ٻڌايو ته سندس اڳ ۾ سرمد پهل سان شادي ٿيل هئي، جنهن کان پوءِ کيس طلاق ملي. هن چيو ته عدت مڪمل ٿيڻ کان پوءِ هن نثار احمد مري سان شريعت ۽ قانون مطابق شادي ڪئي آهي.
جوڙي الزام هنيو ته سندن ڪجهه مائٽ، جن ۾ علي مراد مري، سليمان پهل، گلن پهل ۽ ٻيا شامل آهن، سندن شادي تي ناراض آهن ۽ کين مبينا طور جان کان مارڻ جون ڌمڪيون ڏئي رهيا آهن.
هنن سنڌ جي وڏي وزير، گهرو وزير، آءِ جي سنڌ پوليس، ايس ايس پي نوشهروفيروز ۽ ٻين لاڳاپيل اختيارين کان مطالبو ڪيو ته سندن جان ۽ مال جو تحفظ يقيني بڻايو وڃي ته جيئن هو بنا ڪنهن خوف يا دٻاءَ جي پنهنجي زندگي گذاري سگهن.
نوٽ: مائٽن خلاف لڳايل الزام پسند جي شادي ڪندڙ جوڙي جي دعوائن تي ٻڌل آهن، جن بابت لاڳاپيل ڌرين جو موقف هن خبر ۾ شامل نه ٿي سگهيو آهي.
