پشاور: پاڪستان تحريڪ انصاف (پي ٽي آءِ) جي چيئرمين بئريسٽر گوهر چيو آهي ته عوام ۾ بدگمانيون پيدا ڪندڙ ئي خيبرپختونخوا جي وڏي وزير سهيل آفريدي کي تبديل ڪرڻ جون ڳالهيون ڪري رهيا آهن.
پشاور ۾ ميڊيا سان ڳالهائيندي بئريسٽر گوهر چيو ته ڊاڪٽرن جي ڀرتين بابت ڪجهه شڪايتون سامهون آيون آهن، پر صوبائي صحت واري وزير ٻڌايو آهي ته ڀرتيون مڪمل طور شفاف طريقي سان ڪيون ويون آهن.
هن چيو ته پي ٽي آءِ حڪومت عوام دوست ۽ سٺو بجيٽ پيش ڪيو آهي، جڏهن ته ڪجهه ماڻهو بي بنياد افواهون ڦهلائي وڏي وزير جي تبديلي بابت تاثر ڏيڻ جي ڪوشش ڪري رهيا آهن.
بئريسٽر گوهر وڌيڪ چيو ته سهيل آفريدي کي پارٽي جي اڪثر ميمبرن جي حمايت حاصل آهي. اختلافِ راءِ ضرور موجود آهي، پر وڏي وزير خلاف ڪو به ڌڙو يا بلاڪ قائم ناهي ٿيو.
هن وڌيڪ چيو ته علي امين گنڊاپور عمران خان جي هدايت تي پاڻ استعيفيٰ ڏني هئي، ۽ هو اهڙو ڪو به قدم نٿو کڻي جيڪو پارٽي جي مفادن کي نقصان پهچائي.
