ڪراچي: سنڌ حڪومت بلديه فيڪٽري سانحي واري ڪيس ۾ جوابدارن جي آزادي بابت سپريم ڪورٽ جي فيصلي خلاف نظرثاني درخواست داخل ڪري ڇڏي آهي.
سنڌ حڪومت رحمان عرف ڀولا ۽ زبير چريا جي بريت خلاف سپريم ڪورٽ جي ڪراچي رجسٽري ۾ نظرثاني درخواست داخل ڪئي، جيڪا پراسيڪيوٽر جنرل سنڌ طرفان جمع ڪرائي وئي آهي.
درخواست ۾ قانوني سوال اٿاريو ويو آهي ته ڇا حقيقتن ۽ قانون جي ابتڙ ڏنل فيصلي خلاف آئين جي آرٽيڪل 188 تحت نظرثاني ٿي سگهي ٿي يا نه.
درخواست موجب سپريم ڪورٽ جو فيصلو اکين ڏٺن شاهدن، طبي ثبوتن ۽ ٻين اهم شاهدين کي نظرانداز ڪندي ڏنو ويو، تنهن ڪري ان تي ٻيهر غور ڪرڻ ضروري آهي.
درخواست ۾ اهو نڪتو پڻ اٿاريو ويو آهي ته دهشتگردي ٽوڙ قانون تحت جوابدارن جي بريت واري معاملي ۾ مقتولن جي قانوني وارثن کي اعتراض داخل ڪرڻ جو حق حاصل آهي يا نه، ان قانوني پهلو جو به جائزو ورتو وڃي.
سنڌ حڪومت قانونِ شهادت آرڊر 1984ع جي آرٽيڪل 4 ۽ آرٽيڪل 17 جي لاڳو ٿيڻ بابت پڻ اعتراض اٿاريا آهن.
نظرثاني درخواست ۾ موقف اختيار ڪيو ويو آهي ته فيصلي ۾ زخمي شاهدن جي بيانن ۽ ڪيميڪل ذريعي باهه لڳائڻ بابت ماهرن جي شاهدي کي مناسب اهميت نه ڏني وئي.
واضح رهي ته 10 جون تي سپريم ڪورٽ رحمان عرف ڀولا ۽ زبير چريا جون اپيلون منظور ڪندي دهشتگردي ٽوڙ عدالت ۽ سنڌ هاءِ ڪورٽ جا فيصلا ڪالعدم قرار ڏنا هئا ۽ شڪ جو فائدو ڏيندي ٻنهي جوابدارن کي بري ڪري آزاد ڪرڻ جو حڪم ڏنو هو.
