سکر: ايس ايس پي سکر اظهر خان جي هدايتن تي سکر پوليس پاران سماجي براين ۾ ملوث ماڻهن، منشيات فروشن ۽ جوارين خلاف ڪريڪ ڊائون جو سلسلو جاري آهي. مختلف ٿاڻن جي حدن ۾ ڪارروايون ڪندي وڌيڪ 12 جوابدارن کي گرفتار ڪري منشيات، جوا جو سامان ۽ روڪ رقم هٿ ڪئي وئي، جڏهن ته گرفتار جوابدارن خلاف ڪيس داخل ڪيا ويا آهن.
نيوپنڊ پوليس جون ڪارروايون، 9 جوابدار گرفتار
ايس ايڇ او نيوپنڊ پوليس ڳجهي اطلاع تي ٿاڻي جي حدن ۾ مختلف هنڌن تي ڪارروايون ڪندي منشيات فروشن ۽ جوارين سميت 9 جوابدارن کي گرفتار ڪري ورتو.
پوليس موجب جوا جي اڏي تي ڇاپو هڻي 7 جوارين کي گرفتار ڪيو ويو، جن جي قبضي مان آڪڙا پرچي بڪس، جوا جي ٻين قسمن جا گيمز ۽ روڪ رقم هٿ ڪئي وئي.
گرفتار جوابدارن ۾ دني بخش شيخ، الطاف حسين شيخ، عبدالمنان بندهاڻي، الله ڏنو کوسو، جان مڱڻهار، محمد بخش مهر ۽ صدرالدين شامل آهن. جوابدارن خلاف جوا ايڪٽ تحت ڪيس داخل ڪيو ويو.
نيوپنڊ پوليس جي ٻي ڪارروائي دوران 2 منشيات سپلائرز محمد ارشد راجپوت ۽ محرم گڊاڻي کي وڏي مقدار ۾ منشيات ۽ گٽڪا ماوا سميت گرفتار ڪيو ويو، جن خلاف پڻ ڪيس داخل ڪيو ويو.
ايئرپورٽ پوليس جي ڪارروائي، چرس هٿ
ايئرپورٽ ٿاڻي جي پوليس به ڪامياب ڪارروائي ڪندي منشيات فروش ذوالفقار لغاري کي گرفتار ڪري ورتو. پوليس موجب جوابدار جي قبضي مان 1050 گرام چرس هٿ ڪئي وئي، جنهن خلاف منشيات ايڪٽ تحت ڪيس داخل ڪيو ويو.
سنگرار پوليس جون ڪارروايون، 2 جواري گرفتار
سنگرار ٿاڻي جي پوليس ڳجهي اطلاع تي جوا جي اڏي تي ڇاپو هڻي 2 جوارين غلام اسحاق ٿهيم ۽ حاجي خان ڦلپوٽو کي گرفتار ڪري ورتو.
پوليس موجب جوابدارن جي قبضي مان تاش جا پتا، جوا جي ٻين قسمن جا گيمز ۽ روڪ رقم هٿ ڪئي وئي، جڏهن ته ٻنهي خلاف ڪيس داخل ڪيو ويو.
ايس ايس پي سکر پاران پوليس پارٽين کي شاباش
ايس ايس پي سکر اظهر خان مختلف ٿاڻن جي پوليس پاران منشيات فروشن ۽ سماجي براين ۾ ملوث ماڻهن خلاف ڪيل ڪامياب ڪاررواين تي پوليس پارٽين کي شاباش ڏيندي بهترين ڪارڪردگي تي سندن حوصلا افزائي ڪئي آهي.
