پاڪستان تحريڪ انصاف آزاد ڪشمير جي چونڊن کي رد ڪندي چيو آهي ته چونڊن ۾ عوامي مينڊيٽ جو مذاق اڏايو ويو، پ پ ۽(ن) ليگ کي عوام رد ڪري ڇڏيو.
رپورٽ موجب پاڪستان تحريڪ انصاف جي ڪور ۽ پوليٽيڪل ڪميٽي جو گڏيل اجلاس ٿيو جنهن جي پڌرائي جاري ڪئي وئي آهي. جاري ڪيل پڌرائي موجب ٻنهي ڪميٽين آزاد ڪشمير جي چونڊن کي رد ڪري ڇڏيو. اجلاس ۾ اهو قرار ڏنو ويو ته آزاد ڪشمير جون چونڊون شفاف نه هيون. چونڊن ۾ عوامي مينڊيٽ جو مذاق اڏايو ويو.
تحريڪ انصاف آزاد ڪشمير ۾ فوتگين جي شفاف چاج ۽ ذميوارن جي خلاف ڪارروائي جو مطالبو به ڪيو. جڏهن ته پڌرائي ۾ چيو ويو آهي ته ڪشميري عوام(ن) ليگ ۽ پيپلز پارٽي کي رد ڪري ڇڏيو، گهٽ ٽرن آئوٽ چونڊ عمل تي عوامي عدم اعتماد جو ثبوت آهي.
پي ٽي آءِ طرفان جاري ڪيل پڌرائي ۾ چيو ويو آهي ته 5 آگسٽ اسلام آباد جلسي جون تياريون ۽ اتحادي پارٽين سان مشاورت جاري آهي، اهو جلسو عوامي امنگن جو ترجمان هوندو. تحريڪ انصاف هڪ دفعو ٻيهر باني چيئرمين کي قانوني، آئيني ۽ جيل ۾ انساني حق ڏيڻ جڏهن ته گهر ڀاتين، وڪيلن ۽ پارٽي قيادت سان ملاقات جي اجازت ڏيڻ جو مطالبو ڪيو.
تحريڪ انصاف جي ڪور ڪميٽي چيو ته سمورن سياسي قيدين کي فوري طور تي آزاد ۽ سياسي انتقام وٺڻ بند ڪيو وڃي. پڌرائي ۾ چيو ويو آهي ته پارٽي ۾ اتحاد، نظم، وضبط ۽ يڪجهتي ضروري آهي، سموريون تنظيمون اتحاد ۽ هم آهنگي کي يقيني بنائين جڏهن ته باني چيئرمين جي آزادي ۽ آئين جي بالادستي پارٽي جي اولين ترجيح آهي.
