لاهور سميت پنجاب جي مختلف شهرن ۾ صبح کان تيز برسات جو سلسلو جاري آهي، جنهن سبب هيٺاهين وارا علائقا پاڻي هيٺ اچي ويا، جڏهن ته اهم روڊن تي پاڻي جمع ٿي ويو جنهن سبب ٽريفڪ جو نظام سخت متاثر ٿي ويو آهي.
موسميات کاتي موجب سانوڻي جي برسات جو نئون سسٽم اڄ کان 5 آگسٽ تائين ڪٿي هلڪي ته ڪٿي تيز برسات پوندي، لاهور ۾ به رات دير کان هينئر تائين ڪٿي هلڪي ته ڪٿي تيز برسات جو سلسلو جاري آهي برسات سبب گرمي جي شدت ۾ گهٽتائي اچي وئي ۽ موسم خوشگوار ٿي ويو.
پي ڊي ايم اي طرفان پنجاب ۾ برساتن ۽ امڪاني ٻوڏ کي نظر ۾ رکندي الرٽ جاري ڪيو ويو آهي. لاهور ۾ ايم ڊي واسا جي هدايت تي آپريشنل اسٽاف کي برسات شروع ٿيندي ئي پاڻي جي نيڪال لاءِ اهم روڊن تي پهچڻ جون هدايتون جاري ڪيون ويون آهن. لاهور ۾ هينئر تائين سڀني کان وڌيڪ برسات مغل پوره ۾ 44 ملي ميٽر رڪارڊ ڪئي وئي. جڏهن ته لڪشم يچوڪ ۾ 15.8 اپر مال ۾ 1.8، تانپوره ۾ 38.6، جوهر ٽائون ۾ 26.9، چوڪ ناخدا ۾ 20.2، پاني والا تالاب ۾ 19.8، مناوان ۾ 13.2، شادي پوره ۾ 7.4، نشتر ٽائون ۾ 4.4، فرخ آباد ۾ 1 ۽ سگيان ۾ 0.2 ملي ميٽر برسات رڪارڊ ڪئي وئي.
پي ڊي ايم اي موجب لاهور، قصور، شيخوپوره، ننڪانه صاحب، فيصل آباد، جهنگ، ٽوبه ٽيڪ سنگهه، چنيوٽ، خوشاب، ميانوالي، ليه، بهکر، نور پور تهل، سرگودها، ساهيوال، اوڪاڙه، پاڪ پتن، بهاولپور، بهاوالنگر، رحيم يار خان، خانيوال، ملتان، وهاڙي، لودهران، مظفر ڳڙهه، ڪوٽ ادو، ڊيره غازي خان، راجن پور، راولپنڊي، مري، گليات، اٽڪ، چڪوال، جهلم، منڊي بهاءُالدين، گجرات، گوجرانواله، حافظ آباد، وزير آباد، سيالڪوٽ ۽ نارووال ۾ به وڌيڪ برسات جو امڪان آهي.
لاهور، راولپنڊي، گوجرانواله، گجرات، سيالڪوٽ، فيصل آباد ۽ ملتان ۾ ٻوڏ جو امڪان آهي، جڏهن ته مري، گليات ۽ جابلو علائقن ۾ لينڊ سلائيڊنگ جو خطرو آهي. لاهور ٽريفڪ پوليس رين ايڊوائزري جاري ڪندي برسات جي دوران احتياطي تدبيرون اختيار ڪرڻ جي هدايت ڪري ڇڏي، شهري مناسب رفتار سان ايندڙ گاڏي کان محفوظ رهندي فاصلي کي برقرار رکن، اوچتو بريڪ لڳائڻ کان پاسو ڪن جڏهن ته موٽر سائيڪل سوار هيلمٽ لازمي پائين ۽ اوور ٽيڪنگ کان پاسو ڪن.
