سنڌ زرعي يونيورسٽي ٽنڊوڄام جي لائبريري تي ٿيل مبينا حملي، ڀڃ ڊاهه، قرآنِ مجيد جي بي حرمتي ،شهيد علي خامنه اي ۽ عالمن جون تصويرون ڦاڙڻ واري واقعي خلاف اصغريه پاڪستان جي اڳواڻن ڊاڪٽر مير خان حيدري، مولانا تراب علي، مولانا گلزار علي، ڊاڪٽر عبدالحسين شنباڻي، منصور علي حيدري ۽ ٻين احتجاج ڪندي واقعي جي سخت مذمت ڪئي.
اڳواڻن چيو ته قوم پرستي يا ڪنهن به نظريي جي نالي تي تعليمي ادارن ۾ تشدد، ڀڃ ڊاهه، مذهبي مقدسات جي توهين ۽ خوف جي فضا پيدا ڪرڻ ناقابلِ قبول آهي. يونيورسٽي ڪنهن به سياسي، قوم پرست يا گروهي تنظيم جي جاگير نه، پر هر شاگرد جو تعليمي حق آهي.
اصغريه پاڪستان جي اڳواڻن موجب لائبريري تي ٿيل واقعو صرف ڀڃ ڊاهه نه، پر تعليم، شعور، مذهبي احترام ۽ شاگردن جي بنيادي حقن تي حملو آهي. هنن الزام لڳايو ته واقعي جو مقصد يومِ حسينؑ سميت پرامن مذهبي ۽ فڪري سرگرمين کي روڪڻ ۽ شاگردن کي خوفزده ڪرڻ هو.
اڳواڻن چيو ته حضرت امام حسينؑ جو پيغام ظلم خلاف مزاحمت، حق گوئي ۽ باطل جي سامهون استقامت جو پيغام آهي، جنهن کي ڪنهن به ڌمڪي يا دٻاءَ ذريعي روڪي نٿو سگهجي.
هنن مطالبو ڪيو ته واقعي جي شفاف ۽ فوري تحقيقات ڪئي وڃي، سي سي ٽي وي فوٽيج ۽ ٻيا ثبوت محفوظ ڪيا وڃن، ذميوار عنصرن جي سڃاڻپ ڪري قانون موجب ڪارروائي ڪئي وڃي ۽ ڪنهن به سياسي يا گروهي دٻاءَ کانسواءِ انصاف کي يقيني بڻايو وڃي.
اڳواڻن وڌيڪ مطالبو ڪيو ته يومِ حسينؑ سميت سمورين پرامن مذهبي ۽ تعليمي سرگرمين لاءِ مڪمل تحفظ فراهم ڪيو وڃي ۽ يونيورسٽي ۾ ڪنهن به گروهه جي ڌونس يا اجاره داري جو خاتمو آندو وڃي.
اصغريه پاڪستان جي اڳواڻن چيو ته تعليم، شعور، مذهبي احترام، شاگردن جي حقن ۽ پرامن تعليمي ماحول جي تحفظ لاءِ سندن جدوجهد جاري رهندي.
