پرائمري استادن جي جائز حق سروس اسٽرڪچر جي حاصلات لاءِ پ ٽ الف مرڪز پاران اعلانيل جدوجهد جي ٻئي مرحلي تحت پ ٽ الف تعلقه دادو جي اڳواڻيءَ ۾ سوين استادن طرفان ڀرپور احتجاجي مظاهرو ڪيو ويو.
پ ٽ الف تعلقه دادو جي صدر عمران ڪورائي ۽ جنرل سيڪريٽري پرديپ ڪمار جي اڳواڻيءَ ۾ ايريگيشن پارڪ دادو کان ڪچهري روڊ تائين احتجاجي ريلي ڪڍي وئي.
ريلي ۾ مرد ۽ عورت استادن وڏي انگ ۾ شرڪت ڪئي، جن هٿن ۾ پلي ڪارڊ کڻي پنهنجي جائز مطالبن جي حق ۾ سخت نعريبازي ڪندي ڀرپور آواز بلند ڪيو.
ان موقعي تي پ ٽ الف جي اڳواڻن رانا اسحاق ساقي، امير بخش ڏاوڇ، آصف علي پنهور، غازي خان کرل، شفيق احمد جتوئي، سيد پرويز علي شاهه، لطف علي ڪولاچي، اشرف علي سومرو، رياض حسين کوسو ۽ ٻين خطاب ڪندي چيو ته پ ٽ الف سنڌ جي مرڪزي صدر شفيع محمد سٺيو پاران اعلانيل جدوجهد جي ٻئي مرحلي تحت اڄ سڄي سنڌ ۾ پرائمري استادن پاران احتجاجي مظاهرا ڪيا پيا وڃن، جنهن جي سلسلي ۾ پ ٽ الف تعلقه دادو پاران پڻ سوين استادن سان گڏ ڪچهري روڊ تي احتجاج رڪارڊ ڪرايو ويو.
پ ٽ الف تعلقه دادو جي صدر عمران ڪورائي پنهنجي خطاب ۾ چيو ته سنڌ جي وڏي وزير پاران پرائمري استادن لاءِ سروس اسٽرڪچر جي قيام بابت ڪميٽي جوڙي وئي هئي. ڪيترن ئي سالن جي جدوجهد، غور ويچار ۽ مشاورت کانپوءِ پرائمري استادن جي سروس اسٽرڪچر بابت سمري تيار ڪري منظوري لاءِ اعليٰ اختيارين ڏانهن اماڻي وئي، پر افسوس سان چوڻو پوي ٿو ته ناڻي واري کاتي پاران اعتراض لڳائي سمري رد ڪرڻ پرائمري استادن سان وڏي ناانصافي آهي، جيڪا ڪنهن به صورت ۾ قبول نه ڪئي ويندي.
اڳواڻن وڌيڪ چيو ته سنڌ جا هزارين پرائمري استاد ڪيترن ئي سالن کان پنهنجي جائز حق سروس اسٽرڪچر، ترقي ۽ ٻين بنيادي سهولتن کان محروم آهن. استاد قوم جي مستقبل جا معمار آهن، تنهن ڪري سندن جائز مطالبن کي نظرانداز ڪرڻ بدران فوري طور تي حل ڪيو وڃي.
هنن چيو ته پرائمري استادن کي سندن جائز حق ڏيڻ سان نه رڳو استادن ۾ احساس محرومي ختم ٿيندو، پر تعليمي نظام کي وڌيڪ مضبوط ۽ بهتر بڻائڻ ۾ پڻ مدد ملندي. حڪومت کي گهرجي ته استادن جي مسئلن کي سنجيدگيءَ سان حل ڪندي سروس اسٽرڪچر بابت سمري کي ٻيهر منظور ڪري باقاعده نوٽيفڪيشن جاري ڪري.
پ ٽ الف تعلقه دادو جي اڳواڻن پاڪستان پيپلز پارٽي جي چيئرمين بلاول ڀٽو زرداري، سنڌ جي وڏي وزير سيد مراد علي شاهه، صوبائي وزير تعليم سيد سردار علي شاهه، چيف سيڪريٽري سنڌ سيد آصف شاهه ۽ سيڪريٽري تعليم زاهد حسين عباسي کي اپيل ڪندي مطالبو ڪيو ته سنڌ جي هزارين پرائمري استادن جي سروس اسٽرڪچر سميت سمورن جائز مطالبن کي فوري طور منظور ڪري باقاعده نوٽيفڪيشن جاري ڪيو وڃي.
احتجاج دوران استادن پاران ”استاد اتحاد زنده باد“، ”پ ٽ الف زنده باد“ ۽ ”سروس اسٽرڪچر اسان جو جائز حق آهي“ جا نعرا پڻ هنيا ويا، جڏهن ته اڳواڻن واضح ڪيو ته مطالبن جي منظوري تائين پرامن ۽ آئيني جدوجهد جاري رکڻ جو عزم برقرار رهندو.
