زرعي يونيورسٽي ٽنڊوڄام ۾ 25 سالن بعد ’’سارنگ‘‘ رسالو ٻيهر شايع

سنڌ زرعي يونيورسٽي ٽنڊوڄام ۾ لڳ ڀڳ 25 سالن جي ڊگهي وقفي کانپوءِ شاگردن جو تاريخي رسالو ’’سارنگ‘‘ ٻيهر شايع ڪيو ويو آهي، صوبائي وزير يونيورسٽيز اينڊ بورڊز محمد اسماعيل راهو، يونيورسٽيز اينڊ بورڊز جي سيڪريٽري غلام عباس بلوچ ۽ سنڌ زرعي يونيورسٽي جي وائيس چانسلر انجنيئر پروفيسر ڊاڪٽر الطاف علي سيال گڏيل طور رسالي جي مھورت ڪئي، ان موقعي تي يونيورسٽي ۾ علمي، ادبي ۽ شاگردن سان لاڳاپيل پراڻين روايتن جي بحالي لاءِ، وائيس چانسلر جي ڪيل ڪوششن کي ساراهيو ويو، “سارنگ” رسالو آخري ڀيرو 2001ع ۾ ان وقت جي وائيس چانسلر پروفيسر ڊاڪٽر بشير احمد چانڊيو جي دور ۾ شايع ٿيو هو، جنهن کانپوءِ لڳ ڀڳ 25 سالن تائين ان جي اشاعت معطل رهي، جڏهن ته موجوده انتظاميا جي ڪوششن سان ان کي هڪ ڀيرو ٻيهر نئين انداز سان متعارف ڪرايو ويو آهي، ان سلسلي ۾ وائيس چانسلر انجنيئر پروفيسر ڊاڪٽر الطاف علي سيال چيو ته ’’سارنگ‘‘ رسالي جي اشاعت جي شروعات يونيورسٽي جي پهرين وائيس چانسلر ڊاڪٽر اي. ڪيو. انصاري جي دور ۾ ٿي هئي ۽ هي رسالو يونيورسٽي جي علمي ۽ ادبي تاريخ جو اهم حصو رهيو آهي. هن چيو ته ’’سارنگ‘‘ ۾ استادن، شاگردن ۽ ملازمن پاران سائنسي، ادبي، زرعي ۽ ٽيڪنالاجي بابت مضمون، يونيورسٽي جي سرگرمين جون رپورٽون ۽ فوٽو البم شايع ڪيا ويندا آهن، هن چيو ته هي رسالو ڊگري مڪمل ڪندڙ شاگردن لاءِ سندن تعليمي سفر جي يادگار جي حيثيت رکي ٿو، جڏهن ته يونيورسٽي جي تاريخ، سرگرمين ۽ ڪاميابين کي محفوظ رکڻ لاءِ هڪ اهم ادارتي آرڪائيو جو ڪردار پڻ ادا ڪري ٿو، ڊاڪٽر الطاف علي سيال چيو ته يونيورسٽي انتظاميا شاگردن جي حقن، ڀلائي ۽ تعليمي سهولتن جي بهتري لاءِ قدم کڻي رهي آهي، جڏهن ته ميرٽ کي ھٿي ڏيڻ، شفافيت ۽ منصفاڻي ميرٽ سسٽم جي قيام کي پڻ اوليت ڏني پئي وڃي، صوبائي وزير محمد اسماعيل راهو ۽ يونيورسٽيز اينڊ بورڊز جي سيڪريٽري غلام عباس بلوچ ’’سارنگ‘‘ رسالي جي ٻيهر اشاعت کي ڀليڪار ڪندي وائيس چانسلر ڊاڪٽر الطاف علي سيال جي ڪوششن کي ساراهيو. هنن يونيورسٽي ۾ شاگردن جي علمي ۽ تخليقي سرگرمين جي واڌاري ۽ شاندار روايتن جي بحالي بابت کنيل قدمن جي پڻ تعريف ڪئي.