اسلام آباد: وفاقي گهرو وزير محسن نقوي چيو آهي ته فيلڊ مارشل سيد عاصم منير جي ايراني صدر ڊاڪٽر مسعود پزشڪيان سان ملاقات مثبت ۽ فائديمند رهي. ملاقات دوران ايران-آمريڪا تڪرار، وچ اوڀر ۾ وڌندڙ ڇڪتاڻ ۽ اڳتي وڌڻ جي ممڪن رستن تي تفصيلي ڳالهيون ٿيون.
محسن نقوي پنهنجي ايڪس پوسٽ ۾ چيو ته ٻنهي ڌرين اسلام آباد مفاهمتي يادداشت (MoU) جي بحالي لاءِ گهربل قدمن تي پڻ خيالن جي ڏي وٺ ڪئي. ايراني صدر ملاقات دوران پنهنجي حڪومت جو موقف ۽ خدشا کليءَ طرح بيان ڪيا.
گهرو وزير موجب اها ملاقات اهم اڳڀرائي ثابت ٿي، جنهن ۾ اهم پيش رفت ٿي ۽ ڳالهين جو اختتام انتهائي مثبت ماحول ۾ ٿيو. هن اميد ظاهر ڪئي ته ڳالهين سان پيدا ٿيل مثبت رفتار خطي ۾ وڌيڪ اڳڀرائي ۽ مستقل امن جي قيام ۾ مددگار ثابت ٿيندي.
فيلڊ مارشل سيد عاصم منير ۽ گهرو وزير محسن نقوي ايران جو هڪ ڏينهن وارو دورو مڪمل ڪيو. اهو دورو جاري ايران-آمريڪا تڪرار ۾ تعطل ختم ڪرڻ ۽ خطي ۾ مستقل امن ۽ استحڪام لاءِ پاڪستان جي سفارتي ڪوششن جو حصو هو.
دوري دوران هرمز سامونڊي لنگهه ٻيهر کولڻ، ڇڪتاڻ گهٽائڻ، تڪرار جي جلد خاتمي ۽ علائقائي امن بابت پڻ تفصيلي ڳالهيون ڪيون ويون. ايراني قيادت پاڪستان جي تعميري ڪردار ۽ پرامن حل لاءِ ڪوششن کي ساراهيو.
