شرجيل انعام ميمڻ جي راھوڪي ۾ چونڊ تڪ جي عوام سان ملاقات، مسئلا حل ڪرڻ جي خاطري
حيدرآباد: سنڌ جي سينيئر وزير اطلاعات، ٽرانسپورٽ ۽ ماس ٽرانزٽ ۽ پي ايس-61 جي ميمبر سنڌ اسيمبلي شرجيل انعام ميمڻ پاران راھوڪي ۾ واقع راؤل هائوس ۾ چونڊ تڪ جي عوام جي مان ۾ سانجهاندو ڏنو ويو
ان موقعي تي شرجيل انعام ميمڻ چونڊ تڪ جي مختلف علائقن سان واسطو رکندڙ شهرين، معززن ۽ عوامي نمائندن سان ملاقات ڪئي ۽ سندن مسئلا ٻڌا. علائقي جي ماڻهن پنهنجي پنهنجي علائقن کي درپيش مختلف عوامي مسئلن بابت صوبائي وزير کي آگاهه ڪيو، جنهن تي شرجيل انعام ميمڻ مسئلا غور سان ٻڌندي انهن جي حل لاءِ ضروري قدم کڻڻ جي خاطري ڪرائي.
سانجھاندي واري تقريب کي خطاب ڪندي شرجيل انعام ميمڻ چيو ته عوام سان سڌو سنئون رابطو رکڻ، سندن مسئلا ٻڌڻ ۽ انهن جي حل لاءِ عملي قدم کڻڻ چونڊيل نمائندن جي بنيادي ذميواري آهي. هن چيو ته عوامي مسئلن جي حل لاءِ لاڳاپيل ادارن سان رابطو ڪري اثرائتا قدم کنيا ويندا.
هن چيو ته سنڌ حڪومت پاران سڄي صوبي ۾ عوام جي ڀلائي ۽ بنيادي سهولتن جي فراهمي لاءِ مختلف ترقياتي منصوبن تي ڪم جاري آهي، جڏهن ته ڪيترائي منصوبا مڪمل پڻ ٿي چڪا آهن. حڪومت جي ترجيحن ۾ روڊن جي تعمير ۽ بحالي، صحت، تعليم، پيئڻ جي صاف پاڻي جي فراهمي، نيڪال ، ٽرانسپورٽ ۽ ٻين بنيادي سهولتن ۾ بهتري آڻڻ شامل آهي.
شرجيل انعام ميمڻ چيو ته سنڌ حڪومت جي ترقياتي سرگرمين جو مقصد شهري ۽ ٻهراڙي وارن علائقن جي ماڻهن کي بهتر سهولتون فراهم ڪرڻ، بنيادي ڍانچي کي وڌيڪ مضبوط بڻائڻ ۽ عوام جي زندگيءَ جو معيار بهتر ڪرڻ آهي. هن چيو ته عوامي ضرورتن ۽ مقامي مسئلن کي نظر ۾ رکندي ترقياتي منصوبن تي عملدرآمد جو سلسلو جاري رکيو ويندو.
ان موقعي تي چونڊ تڪ جي معززن ۽ شهرين صوبائي وزير سان مختلف معاملن بابت خيالن جي ڏي وٺ ڪئي، جڏهن ته شرجيل انعام ميمڻ کين يقين ڏياريو ته عوامي مسئلن جي حل لاءِ لاڳاپيل کاتن سان رابطو ڪري ضروري قدم کنيا ويندا ۽ معاملن جي اثرائتي پوئواري ڪئي ويندي.
