شهباز هال ۾ حيدرآباد تعليمي بورڊ جي انٽرميڊيئيٽ سالياني امتحانن 2026ع ۾ نمايان پوزيشنون حاصل ڪندڙ شاگردن ۽ شاگردياڻين جي مانَ ۾ تقريب منعقد ڪئي وئي، جنهن ۾ ڊويزنل ڪمشنر حيدرآباد فياض حسين عباسي خاص مهمان طور شرڪت ڪئي.
تقريب دوران مختلف گروپن ۾ پهرين، ٻي ۽ ٽين پوزيشن حاصل ڪندڙ شاگردن ۽ شاگردياڻين ۾ گولڊ ۽ سلور ميڊلز، روڪ انعام ۽ تعريفي سرٽيفڪيٽ ورهايا ويا.
ان موقعي تي ڪمشنر فياض حسين عباسي پوزيشن هولڊرن، سندن والدين ۽ استادن کي مبارڪباد ڏيندي چيو ته شاگردن جي ڪاميابي ۾ والدين ۽ استادن جو پڻ اهم ڪردار آهي.
چيئرمين حيدرآباد تعليمي بورڊ فقير محمد لاکو چيو ته نمايان پوزيشن حاصل ڪندڙ شاگردن جي حوصلا افزائي لاءِ کين انعامن سان نوازيو ويو آهي.
پهرين پوزيشن حاصل ڪندڙ شاگردن کي گولڊ ميڊل سان گڏ 50 هزار رپيا، جڏهن ته ٻي پوزيشن حاصل ڪندڙن کي سلور ميڊل ۽ 20 هزار رپيا روڪ انعام ڏنو ويو.
