حيدرآباد رپورٽ قادر ملاح سنڌ سميت حيدرآباد ۾ صحافين خلاف مبينا ظلم ۽ انتقامي ڪارروايون بند ڪرڻ لاءِ کٿڙ ۾ احتجاجي مظاهرو

حيدرآباد (رپورٽ قادر ملاح )سنڌ سميت حيدرآباد ۾ صحافين مٿان مبينا ظلم، تشدد، ڪوڙا ڪيس داخل ڪرڻ ۽ انتقامي ڪاررواين خلاف پريس ڪلب سيري کٿڙ جي سڏ تي حيدرآباد جي علائقي کٿڙ ۾ صحافين پاران احتجاجي مظاهرو ڪيو ويو. احتجاج ۾ صحافين، سياسي ۽ سماجي اڳواڻن شرڪت ڪري صحافين سان ٿيندڙ مبينا زيادتين خلاف سخت احتجاج ڪيو ۽ صحافين کي تحفظ فراهم ڪرڻ جو مطالبو ڪيو.احتجاجي مظاهري جي اڳواڻي پريس ڪلب سيري کٿڙ جي صدر عنايت علي ڇلگري، سينيئر نائب صدر مير ثناءالله بڙدي، جنرل سيڪريٽري ناصر ملاح، سينيئر صحافي آغا جانب، جان محمد خاصخيلي، ڪرشن راٺوڙ، غلام مصطفيٰ ملاح، سلطان مري، جاويد بليدي، سليم بلوچ، فياض بلوچ، راڻو ملاح، حميد ملاح ۽ قومي عوامي تحريڪ هوسڙي جي اڳواڻ بابو سولنگي سميت ٻين ڪئي.
ان موقعي تي احتجاج ڪندڙن حيدرآباد جي سينيئر صحافي عبدالغفور سروهي مٿان داخل ڪيل مبينا ڪوڙي ڪيس ۽ مٿس تشدد جي سخت لفظن ۾ مذمت ڪئي. هنن چيو ته صحافي سماج جي اک ۽ ڪن هوندا آهن، جيڪي عوام جا مسئلا، ناانصافيون ۽ معاشري ۾ ٿيندڙ زيادتيون اجاگر ڪري عوام تائين حقيقتون پهچائيندا آهن. صحافين کي پنهنجي صحافتي ذميواريون نڀائڻ تي مبينا طور نشانو بڻائڻ، مٿن ڪيس داخل ڪرڻ ۽ تشدد ڪرڻ آزادي صحافت لاءِ ڳڻتي جوڳو عمل آهي.هنن چيو ته سينيئر صحافي عبدالغفور سروهي مٿان ٿيندڙ مبينا زيادتين جو شفاف ۽ غيرجانبدار نوٽيس ورتو وڃي، واقعي جي مڪمل جاچ ڪرائي وڃي ۽ جيڪڏهن ڪنهن به ڌر قانون جي ڀڃڪڙي ڪئي آهي ته ان خلاف قانون موجب ڪارروائي ڪئي وڃي. احتجاج ڪندڙن مطالبو ڪيو ته صحافين خلاف مبينا انتقامي ڪاررواين جو سلسلو بند ڪري کين بنا خوف ۽ دٻاءَ جي پنهنجا فرض ادا ڪرڻ جو ماحول فراهم ڪيو وڃي.احتجاج دوران عورت صحافي راحبا ذاڪر لغاري مٿان ٿيل حملي جي پڻ سخت مذمت ڪئي وئي. اڳواڻن چيو ته عورت صحافين تي حملا نه رڳو آزادي صحافت پر عورتن جي تحفظ جو به اهم مسئلو آهن. صحافين کي سندن پيشيوراڻيون ذميواريون ادا ڪرڻ دوران تحفظ ڏيڻ حڪومت ۽ لاڳاپيل ادارن جي ذميواري آهي. هنن مطالبو ڪيو ته عورت صحافي راحبا ذاڪر لغاري مٿان ٿيل حملي جي شفاف جاچ ڪرائي، ذميوارن جي نشاندهي ڪري کين قانون جي ڪٽهڙي ۾ آندو وڃي.مظاهرين وڌيڪ چيو ته صحافت جو بنيادي مقصد عوام جي آواز کي اعليٰ اختيارين تائين پهچائڻ، مظلومن سان ٿيندڙ ناانصافين کي اجاگر ڪرڻ ۽ سماج ۾ شفافيت کي هٿي ڏيڻ آهي. جيڪڏهن صحافين کي سچ لکڻ ۽ عوامي مسئلا رپورٽ ڪرڻ تي مبينا طور دٻاءَ، ڌمڪين، تشدد يا ڪوڙن ڪيسن کي منهن ڏيڻو پوندو ته ان سان آزاد صحافت ۽ عوام جي معلومات حاصل ڪرڻ واري حق کي نقصان پهچندو.
هنن حڪومت سنڌ، پوليس جي اعليٰ اختيارين ۽ لاڳاپيل ادارن کان مطالبو ڪيو ته سنڌ ۾ صحافين جي تحفظ لاءِ اثرائتا قدم کنيا وڃن، صحافين خلاف مبينا زيادتين ۽ انتقامي ڪاررواين جي شڪايتن جو نوٽيس ورتو وڃي ۽ صحافين کي آزاديءَ سان پنهنجو پيشوراڻو ڪم ڪرڻ لاءِ محفوظ ماحول فراهم ڪيو وڃي.احتجاج ڪندڙ صحافين ۽ اڳواڻن واضح ڪيو ته صحافين جي حقن، تحفظ ۽ آزادي صحافت لاءِ پرامن ۽ قانوني جدوجهد جاري رکي ويندي. هنن لاڳاپيل اختيارين کان مطالبو ڪيو ته عبدالغفور سروهي ۽ راحبا ذاڪر لغاري وارن معاملن جي شفاف جاچ ڪرائي وڃي