لاڙڪاڻي ۾ شهيد محترمه بينظير ڀٽو انسٽيٽيوٽ آف ٽراما طرفان روڊ حادثن کان بچڻ بابت لاءِ “احتياط ڪيو

لاڙڪاڻو(رپورٽ عادل خان) لاڙڪاڻي ۾ شهيد محترمه بينظير ڀٽو انسٽيٽيوٽ آف ٽراما طرفان روڊ حادثن کان بچڻ بابت لاءِ “احتياط ڪيو، محفوظ رهو” جي عنوان سان ٽراما جاڳرتا هفتو ملهائي جاڳرتا مهم شروع ڪئي وئي آهي. ان سلسلي ۾ شهيد محترمه بينظير ڀٽو انسٽيٽيوٽ آف ٽراما طرفان ٽراما سينٽر لاڙڪاڻو کان ايس ايس پي چوڪ تائين جاڳرتا ريلي ڪڍي وئي جنهن ۾ ايم پي اي لاڙڪاڻو جميل احمد سومرو، چيئرمين ڊسٽرڪٽ ڪائونسل لاڙڪاڻو اعجاز احمد لغاري، چانڊڪا ميڊيڪل اسپتال جي ميڊيڪل سپريٽڊنٽ ڊاڪٽر امجد بجاراڻي، پروفيسر ڊاڪٽر ضمير سومرو، ٽراما سينٽر جي انچارج ڊاڪٽر شاهزيب شيخ سميت پروفيسرن، ڊاڪٽرن، پيراميڊيڪل عملي، ريسڪيو1122، سول سوسائٽي جي نمائندن ۽ شهرين وڏي انگ ۾ شرڪت ڪئي. جتي هنن هٿن ۾ بئنر ۽ پلي ڪارڊ کڻي شهرين کي آگاهي ڏني. ريلي کي خطاب ڪندي ۽ ميڊيا سان ڳالهائيندي ايم پي اي جميل احمد سومرو ۽ ٻين چيو ته شهيد محترمه بينظير ڀٽو انسٽيٽيوٽ آف ٽراما طرفان هفتي لاءِ عوام کي روڊ حادثن کان بچائڻ لاءِ عوامي جاڳرتا مهم هلائي پئي وڃي آهي جيڪا لاڙڪاڻي جي تاريخ ۾ پهريون ڀيرو لاڙڪاڻي جي ٽراما سينٽر طرفان جاڳرتا مهم جي سلسلي ۾ شهرين کي آگاهي ڏني پئي وڃي. هنن چيو ته ننڍي عمر جا ٻار جيڪي تيز رفتاريءَ، ون ويلنگ ڪري، رانگ سائيڊ، شارٽ ڪٽ، يوٽرن وٺي چڙواڳ نموني سان موٽرسائيڪل هلائن ٿا، اهڙو عمل نه صرف قانون جي ڀڃڪڙي آهي پر ان سان قيمتي جانيون ضايع ٿين ٿا، هن جاڳرتا مهم جو مقصد شهرين کي روڊ حادثن کان بچائڻ آهي، ان لاءِ والدين کي گهرجي ته هو پنهنجي ٻارن جي بهتر نموني تربيت کين ڇڙواڳ نه ڇڏين ڇاڪاڻ زندگي قيمتي آهي ان جي سارسنڀال ڪرڻ لازمي آهي ته جيئن روڊ حادثن کان بچي سگهجي. هنن چيو ته قيمتي انساني جانين کي بچائڻ لاءِ هر شهري کي پنهنجي ذميواري محسوس ڪرڻ گهرجي، مقرر رفتار جي حد جو خيال رکي ڊرائيونگ دوران موبائل فون استعمال ڪرڻ کان پاسو ڪيو وڃي. هنن چيو ته جيڪڏهن هر شهري ذميواري جو مظاهرو ڪري ۽ ٽريفڪ ضابطن تي عمل ڪري ته ڪيترين ئي قيمتي انساني جانين کي بچائي سگهجي ٿو.