ڪي پي ۾ ايمرجنسي جو مقصد معدني ذخيرن تي قبضو ۽ آمريڪي سيڙپڪارن لاءِ رستو کولڻ آهي: مولانا فضل الرحمان

اسلام آباد (ويب ڊيسڪ) جمعيت علماءِ اسلام (ف) جي سربراهه مولانا فضل الرحمان چيو آهي ته خيبر پختونخوا جي قبائلي ضلعن ۾ ايمرجنسي لاڳو ڪرڻ جو مقصد رڳو سيڪيورٽي صورتحال کي منهن ڏيڻ نه، پر معدني ذخيرن تائين پهچ حاصل ڪرڻ ۽ ملڪ جا وسيلا پرڏيهي سيڙپڪاريءَ لاءِ کولڻ به آهي.
هڪ ڪانفرنس کي خطاب ڪندي مولانا فضل الرحمان چيو ته قبائلي علائقن ۾ ايمرجنسي لاڳو ڪرڻ جي پويان معدني وسيلن تي ڪنٽرول حاصل ڪرڻ جو مقصد به نظر اچي ٿو.
هن دعويٰ ڪئي ته آمريڪا سان ٿيل معاهدن ذريعي پاڪستان جي وسيلن تي اثر رسوخ وڌائڻ ۽ آمريڪي سيڙپڪاريءَ لاءِ سازگار ماحول پيدا ڪرڻ جي ڪوشش ڪئي پئي وڃي.
مولانا فضل الرحمان چيو ته جيڪڏهن انهن قدمن جي بدلي حڪمرانن کي ڪي محدود مالي فائدا به حاصل ٿين ٿا ته اهي قومي مفادن جي قيمت تي قبول ناهن.
هن خبردار ڪيو ته سندس جماعت اهڙين پاليسين جي حمايت نه ڪندي، مولانا فضل الرحمان اها دعويٰ پڻ ڪئي ته چين ۽ روس سميت ڪجهه اهم ملڪن کي به انهن اڳڀرائين تي خدشا آهن.