پاڪستان پيپلز پارٽي ضلعي ويسٽ جي قيادت سان يو سي 9 جي چيئرمين، وائيس چيئرمين ۽ ڪائونسلرن جي خاص ملاقات، مسئلا جلد حل ڪرڻ جي خاطري

ڪراچي (رپورٽ: پير بخش نوناري)ڪراچي پاڪستان پيپلز پارٽي ضلعي ويسٽ جي صدر عابد حسين ستي ۽ انفارميشن سيڪريٽري علي اڪبر ڪاڇيلو سان گذريل ڏينهن منگهوپير ۾ ضلعي ويسٽ جي مرڪزي آفيس ۾ يونين ڪائونسل 9 جي چيئرمين ارشاد مغل، وائيس چيئرمين علي حسين بروهي، چئني وارڊن جي ڪائونسلرن، اقليتي ڪائونسلرن، عورت ڪائونسلرن ۽ پارٽي جي ٻين اڳواڻن خاص ملاقات ڪئي ملاقات دوران يو سي 9 جي مختلف علائقن ۽ ڳوٺن کي درپيش مسئلن ۽ عوامي شڪايتن بابت تفصيلي خيالن جي ڏي وٺ ڪئي وئي.ان موقعي تي پاڪستان پيپلز پارٽي ضلعي ويسٽ جي صدر عابد حسين ستي ۽ انفارميشن سيڪريٽري علي اڪبر ڪاڇيلو وفد کي خاطري ڪرائي ته علائقي جا مسئلا جلد حل ڪرڻ لاءِ اثرائتا قدم کنيا ويندا.ٻنهي اڳواڻن چيئرمين، وائيس چيئرمين ۽ ڪائونسلرن کي هدايت ڪئي ته پنهنجي يونين ڪائونسل جي سمورن علائقن ۽ ڳوٺن ۾ ترقياتي ڪمن کي ترجيحي بنيادن تي مڪمل ڪرائڻ لاءِ ڪوششون ڪن ۽ عوام سان مسلسل رابطي ۾ رهن، جيئن شهرين جا مسئلا بروقت حل ٿي سگهن.هنن وڌيڪ چيو ته يو سي 9 جي نمائندن جا سمورا جائز خدشا ختم ڪيا ويندا ۽ عوامي مسئلن جي حل لاءِ پارٽي قيادت پاران هر ممڪن سهڪار فراهم ڪيو ويندو.