خيرپور(رپورٽ رنصراللھ) شاهه عبداللطيف يونيورسٽي خيرپور جي اسٽوڊنٽس سوسائٽيز سينٽر (SSC) پاران معزز وائيس چانسلر ميرٽوريس پروفيسر ڊاڪٽر يوسف خشڪ جي ويزن ۽ رهنمائيءَ هيٺ شاگردن لاءِ منشيات جي استعمال جي روڪٿام ۽ ان جي هاڃيڪار اثرن بابت آگاهي سيمينار منعقد ڪيو ويو.
سيمينار جو مقصد يونيورسٽيءَ ۾ صحتمند، محفوظ ۽ منشيات کان پاڪ ماحول کي هٿي وٺرائڻ هو. اسٽوڊنٽس سوسائٽيز سينٽر جي ڪوآرڊينيٽر ڊاڪٽر علي رضا لاشاري پنهنجي خطاب ۾ هائير ايجوڪيشن ڪميشن (HEC) جي منشيات جي استعمال جي روڪٿام ۽ تمباڪو ڪنٽرول بابت پاليسيءَ تي عملدرآمد جي اهميت کي اجاگر ڪيو.
ڊاڪٽر علي رضا لاشاري چيو ته منشيات جي مسئلي کي منهن ڏيڻ لاءِ مسلسل آگاهي مهمون، بچاءَ جا اپاءَ، شروعاتي مرحلي ۾ مسئلي جي سڃاڻپ، بروقت مداخلت ۽ يونيورسٽيءَ اندر رازداريءَ سان شڪايتون ۽ معلومات فراهم ڪرڻ جا اثرائتا طريقا اختيار ڪرڻ ضروري آهن.
شعبه رياضيءَ جي ٽيچنگ اسسٽنٽ اسد عباس منشيات ۽ شراب جي استعمال جي نقصانن تي روشني وجهندي چيو ته نشي جو استعمال انسان جي ذهني صحت، ذاتي زندگي ۽ سماجي لاڳاپن کي متاثر ڪري سگهي ٿو، جڏهن ته ان جا ناڪاري اثر سڄي سماج تي پڻ پون ٿا.
سيمينار دوران شاگردن آگاهيءَ لاءِ مختلف تجويزون پيش ڪيون، جن ۾ مختصر ڪهاڻين ذريعي منشيات جا نقصان اجاگر ڪرڻ، آگاهيءَ وارا سائن بورڊ لڳائڻ ۽ شاگردن تائين اثرائتي نموني پيغام پهچائڻ جا طريقا اختيار ڪرڻ شامل هئا.
سيمينار ۾ پي ايم وائي ڊي سي (PMYDC) جي صدر محمد مزمل، ثانيا، توفيق، نعمان، مريم ۽ نينسي، جڏهن ته وائي پي ڊي سي (YPDC) پاران عبدالڪريم جويو، يسريٰ، موئز علي ۽ سحرش شرڪت ڪئي. ان کان علاوه، اينٽي نارڪوٽڪس اسٽوڊنٽس سوسائٽي ۽ يونيورسٽيءَ جي ٻين سوسائٽين جي شاگردن پڻ شرڪت ڪئي.
هيءَ سرگرمي شاگردن جي ڀلائي، ذميوار شهريت جي شعور ۽ يونيورسٽيءَ ۾ صحتمند، محفوظ ۽ منشيات کان پاڪ ماحول کي هٿي وٺرائڻ لاءِ شاهه عبداللطيف يونيورسٽيءَ جي عزم جي عڪاسي ڪري ٿي.
