سکر (رپورٽ: ذوالفقار سولنگي): سکر جي علائقن ايوب گيٽ ۽ شيخ محلي ۾ مختلف هنڌن تي گندگيءَ جا ڍير لڳي ويا آهن، جنهن سبب صفائيءَ جو نظام سخت متاثر ٿي ويو آهي، جڏهن ته لاڳاپيل انتظاميا طرفان مسئلي جي حل لاءِ ڪي به اثرائتا قدم نظر نه پيا اچن.
گندگيءَ سبب علائقي جا رهواسي سخت پريشانيءَ جو شڪار آهن. شهرين جو چوڻ آهي ته صفائيءَ جي خراب صورتحال سندن روزمره جي زندگيءَ کي متاثر ڪري رهي آهي، پر عوامي مسئلن جي حل لاءِ عملي قدم نه کنيا پيا وڃن.
ٻئي طرف شهرين پاران لاڳاپيل چيئرمين جي فنڊن ۽ سالڊ ويسٽ مئنيجمينٽ جي عملي جي ڪارڪردگيءَ تي پڻ سوال اٿاريا پيا وڃن. شهرين جو چوڻ آهي ته جيڪڏهن صفائيءَ لاءِ فنڊ ۽ عملو موجود آهي ته پوءِ علائقا گندگيءَ جي ڍيرن ۾ ڇو تبديل ٿي رهيا آهن؟
عوامي حلقن لاڳاپيل چيئرمين، ميونسپل انتظاميا ۽ سالڊ ويسٽ مئنيجمينٽ جي اختيارين کان مطالبو ڪيو آهي ته ايوب گيٽ ۽ شيخ محلي ۾ فوري طور صفائي مهم شروع ڪئي وڃي، صفائيءَ جي نظام ۾ مبينا غفلت جو نوٽيس ورتو وڃي ۽ صفائيءَ لاءِ مختص ڪيل فنڊن جي استعمال بابت شفاف وضاحت ڏني وڃي.
شهرين مطالبو ڪيو آهي ته علائقن ۾ باقاعده صفائي ۽ ڪچرو کڻڻ جو انتظام يقيني بڻايو وڃي، جيئن رهواسين کي صاف سٿرو ماحول ملي سگهي.
هاڻي سوال اهو آهي ته شهرين کي صاف ماحول فراهم ڪرڻ جي ذميواري ڪير پوري ڪندو ۽ لاڳاپيل اختياريون هن مسئلي جي حل لاءِ ڪڏهن عملي قدم کڻنديون؟
