يڪجھتي ڪشمير جي حوالي سان ڪاري ڏھاڙي جي موقعي تي دادو ۾ ڊپٽي ڪمشنر دادو جي اڳواڻي ۾ تقريب ۽ ريلي، ڪشميري عوام سان يڪجهتي جو اظھار

 دادو(رپورٽر مختيار علي جتوئي)ڪشمير جي حوالي سان ڪاري ڏھاڙي جي موقعي تي ضلعي انتظاميه دادو پاران ڊپٽي ڪمشنر دادو سيد مرتضيٰ علي شاھ ( تمغه امتياز) جي صدارت هيٺ تقريب ۽ ريلي منعقد ڪئي وئي، جنھن ۾ ڪشميري عوام سان يڪجهتي، سندن حقِ خوداراديت جي حمايت ۽ عالمي برادري جو ڌيان مسئلي ڪشمير ڏانھن ڇڪائڻ جي عزم جو اظھار ڪيو ويو. ان موقعي تي ايڊيشنل ڊپٽي ڪمشنر ٽو عمران علي سيال پڻ موجود هو.
تقريب ۾ سرڪاري آفيسرن، ملازمن، شاگردن، صحافين، سماجي شخصيتن ۽ مختلف مڪتبه فڪر سان تعلق رکندڙ ماڻهن شرڪت ڪئي. تقريب ۾ ڪشميري عوام سان يڪجهتي جي اظھار لاءِ هڪ منٽ جي خاموشي اختيار ڪئي وئي، جنھن کانپوءِ ڪشميري عوام لاءِ دعائون گھريون ويون ۽ يڪجهتي جا پيغام ڏنا ويا.
جنھن بعد ۾ ڊپٽي ڪمشنر دادو جي اڳواڻي ۾ ڊپٽي ڪمشنر آفيس کان پريس ڪلب دادو تائين ريلي ڪڍي وئي. ريلي جي شرڪت ڪندڙن ٻانھُن تي ڪاريون پٽيون ٻڌيون هيون، جڏهن ته هٿن ۾ ڪشميري ۽ پاڪستاني جھنڊا ۽ ڪشميري عوام سان يڪجهتي جا بينر کنيا ويا هئا. شرڪت ڪندڙن ڪشميري عوام جي بنيادي حقن ۽ حقِ خوداراديت جي حمايت جو ورجاءُ ڪيو.ان موقعي تي اسسٽنٽ ڪمشنر دادو سميع الله وڳڻ، ايم ايس ڊي ايڇ ڪيو دادو ڊاڪٽر سيد امتياز علي شاھ، روينيو، تعليم، ميونسپل سميت ٻين سرڪاري کاتن جا آفيسر ۽ ملازم، شاگرد، صحافي، سماجي شخصيتون ۽ شھري پڻ موجود هئا.ڊپٽي ڪمشنر دادو سيد مرتضيٰ علي شاهه ان عزم جو اظھار ڪيو ته ڪشميري عوام جي جائز حقن، آزادي ۽ حقِ خوداراديت جي حمايت جاري رکي ويندي. هن عالمي برادري تي زور ڀريو ته مسئلي ڪشمير جي منصفاڻي حل ۽ ڪشميري عوام کي سندن بنيادي حق ڏيارڻ لاءِ پنھنجو ڪردار ادا ڪري.