ڊپٽي ڪمشنر مٽياري محمد دانش ذاڪر جي هدايتن تي ڊگري ڪاليج مٽياري ۾راندين جا مقابلا منعقد ڪيا ويا

مٽياري (رپورٽ زبيراحمد ڪلهوڙو)ڊپٽي ڪمشنر مٽياري محمد دانش ذاڪر جي هدايتن تي ڊسٽرڪٽ اسپورٽس آفيسر جليل هاليپوٽو جي زير نگرانيءَ گورنمينٽ سردار سيد محمد علي شاهه ڄاموٽ ڊگري ڪاليج مٽياري ۾ راندين جا مقابلا منعقد ڪيا ويا، جن جو مقصد شاگردياڻين ۾ راندين جي سرگرمين کي هٿي ڏيڻ ۽ سندن صلاحيتن کي اجاگر ڪرڻ هو.
راندين جي مقابلن ۾ ايڊيشنل ڊپٽي ڪمشنر ٽو ڊاڪٽر امجد جمالي، اسسٽنٽ ڪمشنر مٽياري عبدالوهاب ميمڻ ۽ ڊسٽرڪٽ انفارميشن آفيسر زبير احمد ميمڻ مهمان طور شرڪت ڪئي. مقابلن ۾ ڪرڪيٽ، رسا ڪشي ۽ ٿرو بال جون ٽي مختلف رانديون شامل هيون، جن ۾ هالا ۽ مٽياري جي ٽيمن حصو ورتو. ٽنهي مقابلن ۾ ميزبان ٽيم گورنمينٽ سردار سيد محمد علي شاهه ڄاموٽ ڊگري ڪاليج مٽياري جي ٽيمن شاندار ڪارڪردگيءَ جو مظاهرو ڪندي ڪاميابي حاصل ڪئي.
ان موقعي تي ڊسٽرڪٽ انفارميشن آفيسر زبير احمد ميمڻ رسا ڪشي جي مقابلي جو افتتاح ڪيو، جڏهن ته ايڊيشنل ڊپٽي ڪمشنر ڊاڪٽر امجد جمالي ڪامياب ٽيمن ۾ انعام ورهايا.تقريب ۾ ڪاليج جي پرنسپال ياسمين شر بلوچ، سينيئر ڊائريڪٽر فزيڪل ايجوڪيشن بشريٰ چشتي، سينيئر ڊائريڪٽر فزيڪل ايجوڪيشن فرزانه انصاري ۽ ان کان علاوه نجمه ميمڻ، آصفه، نوشين، صبا ۽ افشين شرڪت ڪئي.ان موقعي تي راندين جي سرگرمين جي اهميت کي اجاگر ڪندي چيو ويو ته اهڙا مقابلا شاگردياڻين ۾ خود اعتمادي، نظم و ضبط، ٽيم ورڪ ۽ صحتمند مقابلي جو جذبو پيدا ڪرڻ سان گڏ سندن جسماني ۽ ذهني نشونما ۾ پڻ اهم ڪردار ادا ڪن ٿا.تعليمي ادارن ۾ اهڙين سرگرمين جو تسلسل نوجوان نسل جي صلاحيتن کي نکارڻ ۽ راندين جي مثبت ثقافت کي فروغ ڏيڻ لاءِ تمام ضروري آهي.