ڪم وارين جاين تي عورتن کي باعزت ۽ محفوظ ماحول فراهم ڪرڻ سندن حق آهي ،سيد شڪيل حيدر

لاڙڪاڻو (رپورٽ عادل خان) صوبائي محتسب آفيس لاڙڪاڻي ريجن جي ڪنسلٽنٽ سيد شڪيل حيدر چيو آهي ته ڪم وارين جاين تي عورتن کي باعزت ۽ محفوظ ماحول فراهم ڪرڻ سندن حق آهي ڇو ته هراسمينٽ جي واقعن سان عورتون ذهني طور پريشان ٿي وڃن، ان لاءِ کين هراسمينٽ کان بچائڻ لاءِ اداري کي قدم کڻڻا پوندا. اهڙن خيالن جو اظهار هن اڄ شهيد محترمه بينظير ڀٽو انسٽيٽيوٽ آف ٽراما اينڊ ايمرجنسي ريسپانس يونٽ لاڙڪاڻي ۾ ڊاڪٽرن، نرسن ۽ ٻئي عملي جي آگاھيءَ لاءِ ڪوٺايل سيمينار کي خطاب ڪندي ڪيو.  سيد شڪيل حيدر چيو ته جيڪڏهن ادارن اندر ڪم ڪندڙ عورتن کي عزت ۽ احترام وارو ماحول فراهم نه ٿيندو ته اهو هنڌ هنن کي اذيت گهر بڻجي ويندو. هن چيو ته عزت وارو ادارو تحفظ، برابريءَ ۽ وقار سان جوڙيو ويندو آهي. ان لاءِ ادارن ۾ ڪم ڪندڙ عورتن کي جنسي، لفظي ۽ جسماني هراسمينٽ کان پاڪ ۽ پيشيواراڻو ماحول ڏيڻ لازمي آهي. اهو تڏهن ئي ممڪن آهي جڏهن سندن ذاتي حدن، مناسب سهولتن، عزت ۽ احترام جو خيال رکيو ويندو. هن چيو ته عورتون ڪم وارين جاين تي پاڻ سان ٿيندڙ غير مناسب واقعن بابت پنهنجي اداري يا محتسب آفيس ۾ 2010 جي ايڪٽ چار تحت لکت ۾ شڪايتون داخل ڪرڻ گهرجن، اهڙن واقعن جي جاچ لاءِ ڪاميٽيون قائم ڪيون وڃن. اداري جي انتظاميا تي لازمي آهي ته اها انهن ڪاميٽين وسيلي ملندڙ شڪايتن جي جاچ ڪرائي متاثر ماڻهن کي انصاف فراهم ڪن. ان سلسلي ۾ محستب آفيس پڻ ادارن جي هر ممڪن مدد ڪندي. هن چيو ته عورتن کي ڪم وارين جاين تي وقار ۽ عزت سان ڪم ڪرڻ لاءِ قانوني تحفظ مليل آهي. هن زور ڏنو ته جيڪڏهن ڪنهن به ملازم عورت سان ڪو اڻوڻندڙ واقعو پيش اچي ته کين ڪنهن به خوف ۽ خطري بنا آواز اٿارڻ گهرجي ته جيئن اهڙن واقعن کي روڪي سگهجي. سيمينار ۾ ٽراما يونٽ جي ڊاڪٽرن، ڊاڪٽرياڻين، نرسن ۽ ٻئي طبي عملي وڏي انگ ۾ شرڪت ڪئي. جڏهن ته انفارميشن آفيسر لاڙڪاڻو معراج احمد سامٽيو، محتسب جي ڪنسلٽنٽ جا مددگار منصور علي منگي ۽ عبدالسميع سومرو پڻ موجود هئا.