دادو ۾ پوليس ۽ ڏوهارين وچ ۾مقابلو، هڪ ڏوهاري مارجي ويو، هڪ زخمي سميت ٻه گرفتار

دادو (ڊسٽرڪٽ رپورٽر: مختيار علي جتوئي)
دادوفريدآباد ٿاڻي جي حد ۾ لنڪ روڊ تي ڳوٺ علي خان بگھيو ويجهو پوليس ۽ هٿياربند ڏوهارين وچ ۾ مقابلو ٿيو، جنهن دوران هڪ ڏوهاري مارجي ويو، هڪ زخمي حالت ۾ ۽ ٻيو ساٿي گرفتار ڪيو ويو، جڏهن ته هڪ ڏوهاري فرار ٿيڻ ۾ ڪامياب ٿي ويو.پوليس موجب هٿياربند ڏوهاري روڊ تي ڦر ڪرڻ جي ارادي سان ناڪابندي ڪري بيٺل هئا ته گشت ڪندڙ فريدآباد پوليس پارٽي واقعي واري هنڌ پهتي. ان موقعي تي هٿياربند ڏوهارين پوليس پارٽي تي فائرنگ ڪئي، جنهن بعد پوليس پنهنجي بچاءَ ۾ جوابي فائرنگ ڪئي.
پوليس موجب مقابلي دوران هڪ ڏوهاري زخمي حالت ۾ ۽ سندس هڪ ساٿي گرفتار ڪيو ويو، جڏهن ته هڪ ڏوهاري مارجي ويو ۽ ٻيو فرار ٿي ويو. مارجي ويل ڏوهاري جو لاش اسپتال منتقل ڪيو ويو، جڏهن ته زخمي گرفتار جوابدار کي پڻ علاج لاءِ اسپتال آندو ويو.پوليس موجب مارجي ويل ڏوهاري جي سڃاڻپ سمير عرف حبـدار ولد لياقت چانڊيو، رهواسي سعيدپور، تعلقي ميهڙ طور ٿي آهي، جڏهن ته زخمي حالت ۾ گرفتار جوابدار جي سڃاڻپ ذوالفقار ولد محبوب سهاڳ، رهواسي مرزو کوسو، تعلقي ميهڙ ۽ ٻئي گرفتار جوابدار جي سڃاڻپ آصف ولد ديدار چانڊيو طور ڪئي وئي آهي.پوليس موجب مارجي ويل ۽ گرفتار جوابدارن وٽان هڪ ڪلاشنڪوف، ٻه پسٽل ۽ هڪ موٽرسائيڪل هٿ ڪئي وئي آهي.پوليس جو چوڻ آهي ته مارجي ويل جوابدار ۽ سندس ساٿي ڏوهن جي وارداتن ۾ سرگرم هئا، جن خلاف ڦر ۽ پوليس مقابلن جا پنج ڪيس رڪارڊ تي آيا آهن، جڏهن ته وڌيڪ ڏوهاري رڪارڊ حاصل ڪرڻ لاءِ دادو سميت ٻين ضلعن جي پوليس کان پڻ معلومات ورتي پئي وڃي.واقعي بابت وڌيڪ جاچ شروع ڪئي وئي آهي ۽ قانوني ڪارروائي عمل ۾ آندي پئي وڃي.هوڏانهن ايس ايس پي دادو ڪيپٽن (ر) صدام حسين خاصخيلي مقابلي دوران بهادريءَ سان ڪارروائي ڪرڻ تي ايس ايڇ او فريدآباد طارق لاکير ۽ سندس ٽيم، مدد لاءِ پهتل ڊي ايس پي ميهڙ وحيد بيگ لاڙڪ، سي آءِ اي انچارج ميهڙ سجاد علي شاهاني ۽ سموري پوليس پارٽي جي ڪارڪردگيءَ کي ساراهيندي کين شاباس ڏني.