سنڌ زرعي يونيورسٽيءَ جي نوجوانن کي موسمياتي تبديلين ۽ قدرتي آفتن کي منهن ڏيڻ جي تربيت، ”اسان تيار آهيون“ جي سري هيٺ ورڪشاپ منعقد

ٽنڊوڄام (محبوب حسین بوزدار) موسمياتي تبديلين ۽ قدرتي آفتن جي وڌندڙ خطرن کي منهن ڏيڻ لاءِ نوجوانن کي تيار ڪرڻ وقت جي اهم ضرورت آهي، ڇاڪاڻ ته ماحولياتي تحفظ ۽ محفوظ معاشري جي جوڙجڪ ۾ نوجوان نسل جو ڪردار انتهائي اهم آهي. ان سلسلي ۾ سنڌ زرعي يونيورسٽي ٽنڊوڄام جي گرين يوٿ موومينٽ (GYM) ڪلب پاران فيڪلٽي آف ڪراپ پروٽيڪشن ۾ ”تيار“ (TAYAR) پروگرام تحت تربيتي ورڪشاپ منعقد ڪئي وئي، جنهن ۾ يونيورسٽي جي مختلف فيڪلٽين جي شاگردن ۽ شاگردياڻين ڀرپور شرڪت ڪئي، ورڪشاپ جو مقصد نوجوانن کي عملي قدم کڻڻ ۽ مشڪلاتن توڙي قدرتي آفتن کي منهن ڏيڻ جي صلاحيتن سان ليس ڪرڻ هو. ان موقعي تي موسمياتي تبديلين، قدرتي آفتن جي خطرن ۾ گهٽتائي، هنگامي حالتن کي منهن ڏيڻ جي اڳواٽ تياري ۽ مقامي برادرين ۾ آفتن کي منهن ڏيڻ جي سگهه وڌائڻ بابت آگاهي ڏني وئي، ورڪشاپ کي خطاب ڪندي فيڪلٽي آف ڪراپ پروٽيڪشن جي ڊين پروفيسر ڊاڪٽر عبدالمبين لوڌي چيو ته موسمياتي تبديليون هڪ اهم عالمي چئلينج آهن، جن کي منهن ڏيڻ لاءِ فوري، گڏيل ۽ منظم قدم کڻڻ لازمي آهن. هن ٻيلن جي واڍي ۽ صنعتي سرگرمين مان خارج ٿيندڙ دونهين ۽ گئسن کي ماحولياتي تبديلين جا اهم سبب قرار ڏيندي وڻڪاري، وڻن جي حفاظت، قدرتي وسيلن جي بهتر استعمال ۽ ماحول دوست طرزِ زندگي اختيار ڪرڻ تي زور ڏنو، هن چيو ته موسمياتي تبديلين جا اثر گهٽائڻ لاءِ پاڪستان جي هر شهري کي پنهنجي ذميواري ادا ڪرڻي پوندي. رڳو ٻوٽا پوکڻ ڪافي ناهي، پر انهن جي بقا ۽ بهتر واڌ ويجهه لاءِ لڳاتار سار سنڀال پڻ ضروري آهي. هن نوجوانن تي زور ڏنو ته اهي ماحولياتي تحفظ بابت شعور کي عملي قدمن ۾ تبديل ڪن ۽ پنهنجين برادرين کي محفوظ بڻائڻ ۾ سرگرم ڪردار ادا ڪن، ان موقعي تي گرين يوٿ موومينٽ جي فوڪل پرسن ڊاڪٽر محمد جاويد شيخ، جڏهن ته ڪلب جي ڪميٽي جي ميمبرن ڊاڪٽر عبدالوحيد سولنگي ۽ ڊاڪٽر مهرالنساءِ رئيس موسمياتي تبديلين، قدرتي آفتن کي منهن ڏيڻ جي تيارين ۽ برادريءَ جي سطح تي نوجوانن جي شموليت بابت ليڪچر ڏنا. مقررن قدرتي آفتن جا خطرا گهٽائڻ ۽ محفوظ توڙي مضبوط معاشرن جي جوڙجڪ لاءِ نوجوانن جي عملي شرڪت جي اهميت اجاگر ڪئي، ”اسان تيار آهيون“ جي نعري هيٺ منعقد ڪيل هن ورڪشاپ ۾ موسمياتي تبديلين ۽ قدرتي آفتن سبب پيدا ٿيندڙ چئلينجن کي منهن ڏيڻ لاءِ اڳواٽ تياري، گڏيل ذميواري ۽ نوجوانن جي بامقصد شموليت کي خاص اهميت ڏني وئي،ورڪشاپ جي پڄاڻيءَ تي پروفيسر ڊاڪٽر عبدالمبين لوڌي شرڪت ڪندڙن ۾ سرٽيفڪيٽ ورهايا.