منگھوپير ٽائون جي هر علائقي ۾ عوامي ضرورتن موجب ترقياتي ۽ فلاحي منصوبا شروع ڪيا وڃن، چيئرمين حاجي نواز علي بروهي

 ڪراچي(رپورٽ ذوالفقار علي)چيئرمين ٽائون ميونسپل ڪارپوريشن منگھوپير حاجي نواز علي بروهي، UN-Habitat ۽ Islamic Relief جي نمائندن سان گڏ يونين ڪميٽي ون جو دورو ڪيو، جتي هن عوامي سهولت لاءِ قائم ڪرايو ويندڙ پارڪ جي منصوبي جو جائزو ورتو. اهو منصوبو ٽائون چيئرمين حاجي نواز علي بروهي جي خاص دلچسپي ۽ ڪوششن سان ٻنهي ادارن جي سهڪار سان شروع ڪيو پيو وڃي.ان موقعي تي حاجي نواز علي بروهي چيو ته عوام کي بهتر تفريحي سهولتون فراهم ڪرڻ ۽ منگھوپير ٽائون جي مختلف علائقن ۾ صحتمند ۽ خوشگوار ماحول قائم ڪرڻ اسان جي ترجيحن ۾ شامل آهي. UN-Habitat ۽ Islamic Relief جي سهڪار سان يو سي ون ۾ پارڪ جو قيام ان سلسلي ۾ هڪ اهم اڳڀرائي آهي. پارڪ جي تعمير جو ڪم جلد شروع ڪيو ويندو ۽ انشاءَالله هلندڙ مهيني ئي ان جو باقاعده افتتاح ڪيو ويندو.هن چيو ته هي پارڪ نه رڳو يو سي ون پر ان جي آس پاس واقع ڳوٺن ۽ ڀرپاسي جي آبادين جي رهواسين لاءِ پڻ هڪ بهترين تحفو ثابت ٿيندو. هن منصوبي سان ٻارن، نوجوانن، بزرگن ۽ علائقي واسين کي تفريح لاءِ هڪ بهتر ۽ سازگار ماحول ميسر ايندو.چيئرمين حاجي نواز علي بروهي وڌيڪ چيو ته علائقي جي تعمير ۽ ترقي ۽ عوام کي بهتر شهري سهولتون فراهم ڪرڻ لاءِ سمورا دستياب وسيلا ڪتب آندا پيا وڃن. اسان جي ڪوشش آهي ته منگھوپير ٽائون جي هر علائقي ۾ عوامي ضرورتن موجب ترقياتي ۽ فلاحي منصوبا شروع ڪيا وڃن، ته جيئن شهرين کي سندن گهرن جي ويجهو بهتر سهولتون فراهم ڪري سگهجن.هن UN-Habitat ۽ Islamic Relief جي سهڪار کي ساراهيندي چيو ته گڏيل سهڪار سان شروع ڪيل اهڙا فلاحي منصوبا علائقي جي بهتري ۽ عوام جي خوشحاليءَ ۾ اهم ڪردار ادا ڪن ٿا.