سنڌ جي وڏي وزير سيد مراد علي شاهه چيو آهي ته سموري سنڌ ۾ ٽرانسپورٽرز پنهنجن ڀاڙن ۾ اضافو نه ڪندا، صوبي جي هر غريب شهري تائين پيٽرول ۽ پبلڪ ٽرانسپورٽ جي سبسڊي فراهم ڪئي ويندي.
وزيراعليٰ هائوس ۾ اهم پريس ڪانفرنس کي خطاب ڪندي مراد علي شاهه چيو ته روٽ پرمنٽ تي هلندڙ مني بس، بس، ڪوسٽر ۽ ننڍن شهرن ۾ هلندڙ سوزوڪي جي مسافرن کي رليف ڏنو ويندو. جڏهن ته انٽر سٽي بسن جي مهانگن ڊيزل جا خرچ سنڌ حڪومت برداشت ڪندي. هن چيو ته ٽرانسپورٽرز جي ذريعي عوام کي فائدو پهچايو پيو وڃي خوشي آهي ته ٽرانسپورٽرز حڪومت سان تعاون ڪري رهيا آهن.
سنڌ جي وڏي وزير ٻڌايو ته بسن کي هڪ لک روپيه وفاقي حڪومت جي ذريعي صوبائي حڪومتن کي سبسڊي ڏني پئي وڃي، جيڪڏهن فيول جي لاڳت وڌي ٿي ته سنڌ حڪومت ٽرانسپورٽرز سان تعاون ڪندي ته جيئن اهڙي صورتحال ۾ پبلڪ ٽرانسپورٽ جي ڀاڙن ۾ اضافو نه ٿئي.
هوڏانهن سنڌ جي وڏي وزير جي صدارت هيٺ سبسڊي ۽ عوامي رليف بابت اهم اجلاس وزيراعليٰ هائوس ۾ منعقد ٿيو جنهن ۾ صوبائي وزيرن ۽ اعليٰ اختيارين شرڪت ڪئي. اجلاس ۾ شرجيل ميمڻ، ناصر حسين شاهه، مڪيش ڪمار چاوله، چيف سيڪريٽري آصف حيدر شاهه، پرنسپل سيڪريٽري آغا واصف، مرتضيٰ وهاب، ڪمشنر ڪراچي حسن نقوي سميت ٻيا آفيسر به شريڪ ٿيا.
اجلاس جي دوران وڌندڙ پيٽروليم قيمتن کي نظر ۾ رکندي عوام کي رليف فراهم ڪرڻ جي مختلف قدمن تي غور ڪيو ويو. سنڌ جي وڏي وزير چيو ته حڪومت جي ڪوشش آهي ته مهانگائي جي اثرن کي گهٽ ڪندي شهرين کي وڌ کان وڌ سهولت ڏني وڃي. هن واضح ڪيو ته ٽرانسپورٽرز جي لاءِ پيڪيج متعارف ڪرائڻ جو مقصد ڀاڙن ۾ اضافي کي روڪڻ آهي ته جيئن عوام تي وڌيڪ بار نه پوي.
سيد مراد علي شاهه چيو ته خطي جي موجوده صورتحال جي حوالي سان عوامي تعاون انتهائي ضروري آهي پوري قوم کي سادگي اختيار ڪندي وسيلن کي محتاط استعمال کي يقيني بنائڻو پوندو. هن زور ڏنو ته بجلي، گيس ۽ پيٽرول جي بچت وقت جي اهم ضرورت آهي اسان جي عوام باشعور آهي، ماڻهو حالتن کي سمجهنڊي ذميواري جو مظاهرو ڪري رهيا آهن. وزيراعليٰ سنڌ جي ترجمان موجب اجلاس ۾ رليف پيڪيج جو تفصيلي جائزو به ورتو ويو ۽ مختلف تجويزن تي به غور ڪيو ويو.
