اسلام آباد: ملڪ ۾ پيٽروليم شين جي قيمتن بابت اهم انڪشاف سامهون آيو آهي، جنهن موجب هڪ ليٽر پيٽرول ۽ هاءِ اسپيڊ ڊيزل تي وڏو حصو ٽيڪسن ۽ مختلف مارجنز جي صورت ۾ وصول ڪيو پيو وڃي۔
حڪومتي ذريعن مطابق هڪ ليٽر پيٽرول جي اصل ايڪس ريفائنري قيمت 246 رپيا 31 پيسا آهي، پر جڏهن ان ۾ مختلف ٽيڪس، ليويز ۽ مارجنز شامل ڪيا وڃن ٿا ته صارفين تائين پهچندي ان جي قيمت وڌي 399 رپيا 86 پيسا ٿي وڃي ٿي۔
ذريعن جو چوڻ آهي ته في ليٽر پيٽرول تي لڳ ڀڳ 153 رپيا ٽيڪسن ۽ منافع طور وصول ڪيا وڃن ٿا۔ هن ۾ 103 رپيا 50 پيسا پيٽروليم ليوي ۽ 2 رپيا 50 پيسا ڪلائميٽ سپورٽ ليوي شامل آهي۔
ان کان علاوه پيٽرول جي قيمت ۾ 23 رپيا 72 پيسا ڪسٽم ڊيوٽي، 7 رپيا 32 پيسا ان لينڊ فريٽ مارجن، 7 رپيا 87 پيسا آئل مارڪيٽنگ ڪمپنين جو منافع ۽ 8 رپيا 64 پيسا پمپ ڊيلرز جو ڪميشن پڻ شامل ڪيو وڃي ٿو۔
ساڳي طرح هاءِ اسپيڊ ڊيزل تي به وڏي مقدار ۾ ٽيڪس ۽ مارجنز شامل آهن، جن جي ڪري عوام کي وڌيڪ مالي بوجھ برداشت ڪرڻو پوي ٿو۔ ذريعن مطابق ڊيزل تي لڳ ڀڳ 116 رپيا في ليٽر ٽيڪسن ۽ منافع جي صورت ۾ وصول ڪيا وڃن ٿا۔
ماهرن جو چوڻ آهي ته پيٽروليم شين تي وڌندڙ ٽيڪسن سبب نه صرف ٽرانسپورٽ جا خرچ وڌن ٿا پر مهانگائي ۾ به اضافو ٿئي ٿو، جنهن جو سڌو اثر عام ماڻهو تي پوي ٿو۔
هن صورتحال ۾ عوامي حلقن پاران مطالبو ڪيو پيو وڃي ته حڪومت پيٽروليم شين تي ٽيڪسن ۾ گهٽتائي ڪري ته جيئن مهانگائي جي دٻاءَ کي گهٽائي سگهجي ۽ ماڻهن کي ڪجهه رليف ملي سگهي۔
