وزيراعظم شهباز شريف چيو آهي ته پاڪستان دنيا ۽ خطي ۾ امن قائم ڪرڻ لاءِ اهم ڪردار ادا ڪيو آهي ۽ اڃا تائين ڪري رهيو آهي، خاص طور تي آمريڪا ۽ ايران وچ ۾ تڪرار دوران.
اسلام آباد ۾ عالمي “پيغامِ اسلام” ڪانفرنس کي خطاب ڪندي وزيراعظم چيو ته پاڪستان سفارتي ڪوششن ذريعي ٻنهي ملڪن کي ڳالهين جي ميز تي آڻڻ ۾ ڪامياب ٿيو. هن چيو ته پاڪستان جي دعوت تي آمريڪا ۽ ايران جي قيادت اسلام آباد آئي ۽ گڏ ويٺي، جيڪو 1979 کان پوءِ پهريون ڀيرو ٿيو آهي.
وزيراعظم اميد ظاهر ڪئي ته جاري ڳالهيون مستقل امن ۾ تبديل ٿينديون ۽ خطي ۾ استحڪام پيدا ٿيندو. هن زور ڏنو ته پاڪستان هميشه تڪرارن جو حل ڳالهين ذريعي ڪڍڻ جو حامي رهيو آهي.
شهباز شريف سعودي ولي عهد محمد بن سلمان جي ڪردار کي به ساراهيو ۽ چيو ته هن امن جي ڪوششن ۾ اهم مدد فراهم ڪئي.
هن وڌيڪ چيو ته پاڪستان جو امن لاءِ ڪردار مستقبل ۾ به جاري رهندو ۽ ملڪ عالمي سطح تي امن ۽ استحڪام لاءِ پنهنجون ڪوششون جاري رکندو.
