ڀارت جي مليالم فلم انڊسٽري سان لاڳاپيل مشهور اداڪار سنتوش نائر هڪ افسوسناڪ ٽريفڪ حادثي ۾ حياتي وڃائي ويٺا، جڏهن ته سندن زال سخت زخمي ٿي پئي آهي۔
ڀارتي ميڊيا موجب اهو واقعو اربع جي صبح رياست ڪيرالا ۾ پيش آيو، جتي سنتوش نائر جي ڪار هڪ لاري سان ٽڪرائجي وئي۔ حادثي جي نتيجي ۾ هو ۽ سندن زال سبهاشري زخمي ٿي پيا۔
مقامي پوليس موجب اداڪار کي شديد زخم رسيا ۽ سندن سينو اسٽيئرنگ ويل سان ٽڪرائجي ويو، جنهن سبب هو بچي نه سگهيا۔ جڏهن ته سندن زال جي پسلين ۾ فريڪچر ٿيو آهي ۽ هوءَ اسپتال ۾ علاج هيٺ آهي۔
67 ورهين جي سنتوش نائر جي پٺيان سندس زال کان علاوه هڪ ڌيءَ راجشري ايس نائر آهي۔ ميڊيا رپورٽن موجب اڃا تائين واضح نه ٿي سگهيو آهي ته حادثي وقت سندن ڌيءَ ڪار ۾ موجود هئي يا نه۔
واضح رهي ته سنتوش نائر پنهنجي فلمي ڪيريئر جو آغاز 1982ع ۾ ڪيو ۽ ڊگهي عرصي دوران هن 100 کان وڌيڪ فلمن ۾ اداڪاري جا جوهر ڏيکاريا۔ هن مشهور اداڪارن پرتھوي راج سوڪومرن ۽ موهن لال سان پڻ ڪم ڪيو، ۽ مليالم سينيما ۾ هڪ سڃاڻپ بڻجي ويو۔
سندس اوچتي وفات تي فلمي دنيا ۾ ڏک جي لهر ڇانئجي وئي آهي ۽ مداح توڙي ساٿي فنڪار کيس خراج عقيدت پيش ڪري رهيا آهن۔
