ڪولڪاتا: ڀارت جي رياست اولهه بنگال جي شهر هلديه ۾ واقع هڪ آئل ريفائنري ۾ باهه لڳڻ سبب گهٽ ۾ گهٽ 15 ڄڻا زخمي ٿي پيا، جن مان ڪجهه جي حالت ڳڻتي جوڳي ٻڌائي پئي وڃي.
ڀارتي ميڊيا موجب، باهه جو واقعو اڱاري جي صبح 4 کان 5 وڳي جي وچ ۾ هلديه پيٽروڪيميڪل لميٽيڊ جي ريفائنري ۾ پيش آيو، جتي هڪ پائپ لائن ۾ اوچتو باهه ڀڙڪي اٿي.
رپورٽن مطابق باهه تمام تيزي سان پکڙجي وئي، جنهن جي نتيجي ۾ واقعي واري هنڌ موجود ڪيترائي مزدور ۽ ٻيا ماڻهو سڙي زخمي ٿي پيا. هنگامي امدادي ٽيمن فوري طور باهه وسائڻ جون ڪارروايون شروع ڪيون ۽ زخمين کي ويجهن اسپتالن ڏانهن منتقل ڪيو.
ڀارتي ميڊيا جو چوڻ آهي ته واقعي ۾ زخمي ٿيل گهٽ ۾ گهٽ 15 ڄڻن کي طبي امداد فراهم ڪئي پئي وڃي، جڏهن ته ڪجهه زخمين جي حالت نازڪ هجڻ سبب کين خاص نگراني ۾ رکيو ويو آهي.
ريفائنري انتظاميا موجب، ابتدائي طور شڪ ظاهر ڪيو پيو وڃي ته باهه پائپ لائن مان تيل چوري ڪرڻ جي ڪوشش سبب لڳي هوندي، پر واقعي جي اصل سببن بابت حتمي نتيجا جاچ مڪمل ٿيڻ کان پوءِ ئي سامهون ايندا.
اختيارين واقعي جي جاچ شروع ڪري ڇڏي آهي ۽ پائپ لائن، حفاظتي نظام ۽ ٻين لاڳاپيل معاملن جو تفصيلي جائزو ورتو پيو وڃي ته جيئن باهه لڳڻ جا اصل ڪارڻ معلوم ڪري مستقبل ۾ اهڙن واقعن کان بچي سگهجي.
ريسڪيو ۽ فائر برگيڊ جون ٽيمون باهه تي ضابطو آڻڻ کان پوءِ علائقي کي محفوظ قرار ڏيڻ لاءِ وڌيڪ جاچ جاري رکيو ويٺيون آهن، جڏهن ته انتظاميا چيو آهي ته متاثر ٿيندڙ ماڻهن کي هر ممڪن طبي ۽ انتظامي سهولت فراهم ڪئي پئي وڃي.
