سکر (دانش راجپوت): سيپڪو پاور ڊويزن جي خاص هدايتن تي سپرنٽنڊنگ انجنيئر (ايس اي) عبدالحق سيال ۽ ايڪسين (XEN) سکر سٽي خليل چانڊيو جي خاص نگراني هيٺ سب ڊويزن ون جي حدن ۾ بجلي چوري ڪندڙن ۽ نادهندن خلاف خصوصي ڪريڪ ڊائون ڪيو ويو.
ڪارروائي دوران 25 کان وڌيڪ بجلي جا ڪنيڪشن منقطع ڪيا ويا، جن ۾ بجلي چوري ۾ ملوث ماڻهن ۽ ڊگهي عرصي کان واجبات ادا نه ڪندڙ نادهندن جا ڪنيڪشن شامل هئا.
آپريشن دوران غيرقانوني طور استعمال ٿيندڙ بجلي جون تارون به لاهي قبضي ۾ ورتيون ويون.
ڪارروائي جي اڳواڻي ايس ڊي او سب ڊويزن ون رمضان اصغر ملڪ ۽ شجاع گھمرو ڪئي، جڏهن ته ٽيم ۾ سيد موجود شاهه، محمد ابراهيم ڏهر، ارشد شريف، نثار احمد لاکو، هارون سيال، ڪفيل احمد، ساجد آرائين ۽ ٻيا آفيسر ۽ اهلڪار پڻ شامل هئا.
سيپڪو اختيارين جو چوڻ آهي ته بجلي چوري قومي نقصان جو سبب بڻجي ٿي، تنهن ڪري اهڙن عنصرن ۽ نادهندن خلاف بنا ڪنهن فرق جي ڪارروائيون مستقبل ۾ به جاري رهنديون، جيئن لائين لاسز ۾ گهٽتائي آڻي عوام کي بجلي جي بهتر فراهمي يقيني بڻائي سگهجي.
