ڄامشورو (ويب ڊيسڪ) شهيد الله بخش آرٽ اينڊ ڊيزائن يونيورسٽي ڄامشورو ۾ ٻن شاگردياڻين وچ ۾ جهيڙي جو واقعو پيش آيو، جنهن جي وڊيو سوشل ميڊيا تي وائرل ٿي وئي آهي.
رپورٽن موجب، واقعو ڪجهه ڏينهن اڳ يونيورسٽيءَ جي ڪينٽين ۾ پيش آيو، جتي ٻئي شاگردياڻيون پاڻ ۾ هٿين پئجي ويون.
وائرل وڊيو ۾ ڏسي سگهجي ٿو ته ٻنهي هڪ ٻئي جا وار پٽيا، چماٽون هنيون ۽ هڪ ٻئي کي ڪيرائڻ جي ڪوشش ڪئي.
وڊيو وائرل ٿيڻ کان پوءِ وائيس چانسلر واقعي جو نوٽيس ورتو ۽ جاچ لاءِ ڪميٽي جوڙي وئي. ڪميٽي ٻنهي شاگردياڻين کي طلب ڪري سندن بيان پڻ رڪارڊ ڪيا آهن.
ذريعن موجب، جهيڙي جي شروعات هڪ ٻئي کي اوڙاپي تي ڳالهائڻ تان ٿي، جڏهن ته واقعي بابت جاچ اڃا مڪمل نه ٿي آهي.
يونيورسٽيءَ جي ترجمان لطيف گاڏهي موجب، وائيس چانسلر جي نوٽيس کان پوءِ جاچ جاري آهي. هن چيو ته يونيورسٽيءَ ۾ ضابطن جي ڀڃڪڙيءَ تي سزا ۽ جزا جو عمل موجود آهي، جڏهن ته جاچ رپورٽ جي روشنيءَ ۾ وائيس چانسلر اربيله ڀٽو طرفان ڪارروائي ڪئي ويندي.
