عمرڪوٽ: خشڪ ڳاڙهين مرچن جي اگهن جي تعين لاءِ ڊپٽي ڪمشنر نويد الرحمان لاڙڪ جي صدارت هيٺ ضلعي پرائس ڪميٽي جو اجلاس

ڊپٽي ڪمشنر عمرڪوٽ نويد الرحمان لاڙڪ جي صدارت هيٺ خشڪ ڳاڙهين مرچن جي مارڪيٽ ۾ اگهن جي تعين بابت ضلعي پرائس ڪميٽي جو اهم اجلاس ڊپٽي ڪمشنر آفيس عمرڪوٽ ۾ منعقد ٿيو.
اجلاس ۾ اسسٽنٽ ڪمشنر ڪنري محمد خان، ايڊيشنل ڊائريڪٽر ايگريڪلچر ايڪسٽينشن عمرڪوٽ ايياز ڪاڇيلو، ايڊيشنل ڊائريڪٽر مارڪيٽنگ ڪميٽي ضلعو عمرڪوٽ، اسسٽنٽ ڊائريڪٽر بيورو آف سپلاءِ اينڊ پرائسز ضلعو عمرڪوٽ سميت آبادگارن ۽ مرچ منڊي سان لاڳاپيل نمائندن شرڪت ڪئي. اجلاس دوران ضلعو عمرڪوٽ ۾ پيدا ٿيندڙ خشڪ ڳاڙهين مرچن جي موجوده مارڪيٽ صورتحال، پيداوار، طلب ۽ رسد، معيار، مارڪيٽ ۾ هلندڙ اگهن ۽ آبادگارن توڙي واپارين کي درپيش مسئلن جو تفصيلي جائزو ورتو ويو. لاڳاپيل کاتن جي آفيسرن خشڪ ڳاڙهين مرچن جي اگهن ۽ مارڪيٽ جي صورتحال بابت اجلاس کي بريفنگ ڏني. ان موقعي تي آبادگارن ۽ مرچ منڊي جي نمائندن خشڪ ڳاڙهين مرچن جي خريد ۽ وڪري، معيار ۽ مارڪيٽ ۾ اگهن بابت پنهنجا مسئلا ۽ تجويزون ڊپٽي ڪمشنر آڏو پيش ڪيون. ڊپٽي ڪمشنر عمرڪوٽ نويد الرحمان لاڙڪ لاڳاپيل آفيسرن کي هدايت ڪئي ته خشڪ ڳاڙهين مرچن جي اگهن جي تعين دوران آبادگارن، آڙهتين، واپارين ۽ صارفين جي مفادن کي نظر ۾ رکندي مارڪيٽ جي حقيقي صورتحال جو جائزو ورتو وڃي ۽ مارڪيٽ ريٽ مقرر ڪيو وڃي. ھن وڌيڪ هدايت ڪئي ته مرچ منڊي ۾ سمورا دڪاندار ڪمپيوٽر ڪانٽو لڳائڻ جا پابند هوندا. ھن چيو ته زرعي جنسن جي اگهن بابت سمورن لاڳاپيل ڌرين سان صلاح مشورو ڪرڻ ۽ دستياب مارڪيٽ ڊيٽا کي نظر ۾ رکڻ ضروري آهي. هن لاڳاپيل آفيسرن کي هدايت ڪئي ته مارڪيٽ ۾ اگهن جي نگراني، معيار ۽ خريد ۽ وڪري جي معاملن تي پڻ نظر رکي وڃي، ته جيئن آبادگارن ۽ واپارين کي درپيش مسئلن جو بروقت ازالو ممڪن بڻائي سگهجي. اجلاس ۾ آبادگار سرور درس، زميندار شڪيل احمد باجوا، زميندار عمران خان پٺاڻ، زميندار ميان محمد سليم، زميندار ميان سعيد، صدر مرچ منڊي ايسوسيئيشن ڪنري، نائب صدر مرچ منڊي ايسوسيئيشن ڪنري سميت ٻيا لاڳاپيل آفيسر ۽ نمائندا پڻ موجود هئا.