سيوريج لائن وڇائڻ جو ڪم باقاعده طور شروع ڪيو ويو آهي،ٽائون چيئرمين حاجي نواز علي بروهي

ڪراچي (ذوالفقار)ٽائون ميونسپل ڪارپوريشن منگھوپير جي يونين ڪميٽي 01 جي علائقي حاجي محمود ڳوٺ جي رهواسين کي درپيش سيوريج جي پراڻي مسئلي جي حل ڏانهن اهم عملي اڳڀرائي سامهون آئي آهي، جتي ٽائون چيئرمين حاجي نواز علي بروهي جي خاص توجهه ۽ ڪوششن سان سيوريج لائن وڇائڻ جو ڪم باقاعده طور شروع ڪيو ويو آهي.ٽائون چيئرمين حاجي نواز علي بروهي حاجي محمود ڳوٺ پهچي سيوريج لائن وڇائڻ جي جاري ڪم جو تفصيلي معائنو ڪيو. هن موقعي تي موجود لاڳاپيل آفيسرن ۽ انجنيئرنگ عملي کان منصوبي جي اڳڀرائي، فني معاملن ۽ ڪم جي معيار بابت ڄاڻ حاصل ڪئي ۽ هدايت ڪئي ته ترقياتي ڪم مقرر ڪيل فني معيار موجب تيزي سان مڪمل ڪيو وڃي، جيئن علائقي جي رهواسين کي بنا دير نيڪالِ آب جي بهتر سهولت فراهم ٿي سگهي.ان موقعي تي اي اي اي آفاق عالم، سب انجنيئر جنيد صديقي، علائقي جا معزز ماڻهو، پاڪستان پيپلز پارٽي جا مقامي اڳواڻ ۽ علائقي جا رهواسي پڻ موجود هئا.حاجي نواز علي بروهي جي حاجي محمود ڳوٺ آمد تي علائقي جي رهواسين پاران سندس پرتپاک استقبال ڪيو ويو. علائقي جي رهواسين سنڌ جي روايتي ثقافت موجب کيس اجرڪ پارائي ۽ سيوريج جي پراڻي مسئلي جي حل لاءِ عملي قدم کڻڻ تي سندس ٿورا مڃيا.ان موقعي تي علائقي جي رهواسين چيو ته حاجي محمود ڳوٺ ۾ سيوريج جو مسئلو ڊگهي عرصي کان شهرين لاءِ سخت پريشاني جو سبب بڻيل هو، جنهن سبب برساتن ۽ روزمره جي معمولات دوران مسئلا وڌيڪ وڌي ويندا هئا. هنن چيو ته سيوريج لائن وڇائڻ جو ڪم شروع ٿيڻ علائقي جي هڪ اهم عوامي ضرورت جي پورائي آهي، جنهن سان شهرين کي درپيش مسئلن ۾ گهٽتائي ايندي ۽ نيڪالِ آب جو نظام بهتر بڻائڻ ۾ مدد ملندي.علائقي جي رهواسين ٽائون چيئرمين حاجي نواز علي بروهي جا ٿورا مڃيندي چيو ته عوامي مسئلن کي ترجيحي بنيادن تي حل ڪرڻ ۽ بنيادي بلدياتي سهولتون فراهم ڪرڻ لاءِ عملي قدمن جي شروعات هڪ ساراهه جوڳو عمل آهي. علائقي جي رهواسين اميد ظاهر ڪئي ته سيوريج لائن جو منصوبو مقرر ڪيل معيار موجب جلد مڪمل ٿيڻ سان حاجي محمود ڳوٺ جي رهواسين کي ڊگهي عرصي کان هلندڙ مسئلي مان مستقل ڇوٽڪارو حاصل ٿيندو.ان موقعي تي ٽائون چيئرمين حاجي نواز علي بروهي چيو ته شهرين کي بنيادي بلدياتي سهولتون فراهم ڪرڻ ۽ سندن پراڻن مسئلن جو ازالو ٽائون انتظاميه جي پهرين ترجيحن ۾ شامل آهي. هن لاڳاپيل آفيسرن کي هدايت ڪئي ته جاري سيوريج لائن جي ڪم ۾ معيار ۽ پائيداري کي هر صورت ۾ يقيني بڻايو وڃي ۽ منصوبي جي تڪميل ۾ غير ضروري دير کان پاسو ڪيو وڃي.
هن وڌيڪ چيو ته منگھوپير ٽائون جي مختلف علائقن ۾ عوامي ضرورتن ۽ مقامي مسئلن کي نظر ۾ رکندي ترقياتي ۽ بلدياتي ڪمن جو سلسلو جاري آهي، جڏهن ته عوام کي بنيادي سهولتون فراهم ڪرڻ لاءِ سمورا دستياب وسيلا موثر طريقي سان ڪتب آندا پيا وڃن.