شاھ عبداللطيف يونيورسٽي خيرپور ۾ ايڊوانسڊ اسٽڊيز اينڊ ريسرچ بورڊ جو 83 هون اجلاس اهم

خيرپو(رپورٽ نصراللھ)شاھ عبداللطيف يونيورسٽي خيرپور ۾ ايڊوانسڊ اسٽڊيز اينڊ ريسرچ بورڊ جو 83 هون اجلاس اهم علمي ۽ تحقيقي فيصلن سان گڏ پڄاڻي تي پهتو جنهن ۾ 29 پوسٽ گريجوئيٽ اسڪالرز کي ڊگريون ڏيڻ جي سفارش ڪرڻ سان گڏ اهڙي تحقيق کي هٿي وٺرائڻ تي زور ڏنو ويو، جيڪا عملي ۽ سماجي مسئلن جي حل لاءِ ڪارآمد ثابت ٿي سگهي.اجلاس يونيورسٽي جي سنڍيڪيٽ هال ۾ منعقد ٿيو،جنهن جي صدارت يونيورسٽي جي وائيس چانسلر ميريٽوريس پروفيسر ڊاڪٽر يوسف خشڪ ڪئي. اجلاس دوران بورڊ 5 پي ايڇ ڊي اميدوارن ۽ 24 ايم ايس/ايم فل اسڪالرز کي سندن لاڳاپيل ڊگريون ڏيڻ لاءِ علمي طور منظوري ڏني.بورڊ يونيورسٽي جي مختلف فيڪلٽيز سان لاڳاپيل ايم ايس، ايم فل ۽ پي ايڇ ڊي اسڪالرز پاران پيش ڪيل ڪيترن ئي نون تحقيقي منصوبن جي پڻ منظوري ڏني. اهي تحقيقي تجويزون يونيورسٽي پاران پوسٽ گريجوئيٽ تحقيق ۽ علمي ترقي کي وڌيڪ مضبوط بڻائڻ لاءِ جاري ڪوششن جي عڪاسي ڪن ٿيون.اجلاس کي خطاب ڪندي وائيس چانسلر پروفيسر ڊاڪٽر يوسف خشڪ هائير ايجوڪيشن ڪميشن جي مقرر ڪيل معيارن ۽ ضابطن تي سختي سان عملدرآمد جي ضرورت تي زور ڏنو، خاص طور تي پوسٽ گريجوئيٽ تعليم ۽ تحقيق جي حوالي سان. هن چيو ته يونيورسٽي ۾ ٿيندڙ تحقيق رڳو علمي گهرجن تائين محدود نه رهڻ گهرجي، پر اها حقيقي زندگيءَ جي مسئلن جي حل ۽ معاشري ۽ ملڪ لاءِ عملي فائدن جي پيداوار جو ذريعو بڻجڻ گهرجي.ڊاڪٽر يوسف خشڪ چيو ته اسان کي تحقيق ۽ علمي معاملن جي ڇنڊڇاڻ لاءِ وڌيڪ بهتر ميڪانيزم جوڙڻ گهرجن ۽ سموري عمل کي منظور ٿيل پاليسي مطابق سختي سان لاڳو ڪرڻ گهرجي.“ هن وڌيڪ چيو ته تحقيقي ڊگريون بامقصد ۽ مقابلي واري نوعيت جي تحقيقي منصوبن سان ڳنڍيل هجڻ گهرجن، جڏهن ته پروجيڪٽ بيسڊ ريسرچ ذريعي معاشري ۽ ملڪ تي وڌيڪ مثبت اثر پيدا ڪري سگهجي ٿو.وائيس چانسلر فيڪلٽي ميمبرن ۽ پروفيسرن کي پڻ همٿايو ته هو تحقيقي منصوبن ۽ فنڊنگ جي موقعن لاءِ سرگرم ڪردار ادا ڪن ۽ هائير ايجوڪيشن ڪميشن.چيمبرز آف ڪامرس ۽ ٻين قومي ۽ بين الاقوامي فنڊنگ ادارن کان تحقيقي منصوبن لاءِ فنڊ حاصل ڪرڻ جي ڪوشش ڪن. هن چيو ته مقابلي واري نوعيت جا تحقيقي منصوبا حاصل ڪرڻ سان يونيورسٽي جي تحقيقي ماحول کي وڌيڪ مضبوط بڻائڻ سان گڏ اسڪالرز ۽ فيڪلٽي ميمبرن کي ڪميونٽي ۽ معاشري جي مسئلن لاءِ عملي حل تيار ڪرڻ جا موقعا پڻ ملندا.ڊاڪٽر يوسف خشڪ علمي ۽ تحقيقي پاليسين جي ڇنڊڇاڻ، منظوري ۽ عملدرآمد لاءِ اثرائتا ميڪانيزم قائم ڪرڻ جي اهميت تي پڻ زور ڏنو. هن لاڳاپيل اختيارين کي هدايت ڪئي ته پوسٽ گريجوئيٽ تعليم ۽ تحقيق سان لاڳاپيل سمورا عمل شفاف طريقي سان ۽ يونيورسٽي جي مقرر ڪيل پاليسين ۽ ضابطن مطابق سختي سان سرانجام ڏنا وڃن.اجلاس جي ڪاروائي ميمبر ڊاڪٽر منير احمد قاضي هلائي، جڏهن ته پوسٽ گريجوئيٽ اسٽڊيز جي سيڪريٽري مسٽر اسلام گل مهر ڪاروائي ۾ سهڪار ڪيو.اجلاس ۾ پروفيسر ڊاڪٽر مقصود ضياءَ، پروفيسر ڊاڪٽر واحد بخش جتوئي، پروفيسر ڊاڪٽر مينهون خان لغاري، پروفيسر ڊاڪٽر غلام مصطفيٰ مشوري، پروفيسر ڊاڪٽر نور احمد شيخ، پروفيسر ڊاڪٽر مشتاق علي جکراڻي، پروفيسر ڊاڪٽر لياقت علي چانڊيو، پروفيسر ڊاڪٽر اختيار علي گهمرو، پروفيسر ڊاڪٽر ارم راڻي، پروفيسر ڊاڪٽر تسليم ابڙو، پروفيسر ڊاڪٽر سجاد علي رئيسي، ڊاڪٽر مظفر سروهي ۽ ڊاڪٽر صاحب اوڏ شامل هئا.انتظامي عملدارن ۾ رجسٽرار محمد حسن هاليپوٽو، امام بخش ۽ ظفر علي سميت ٻين لاڳاپيل آفيسرن پڻ اجلاس ۾ شرڪت ڪئي.اجلاس جي شرڪت ڪندڙن وائيس چانسلر پروفيسر ڊاڪٽر يوسف خشڪ جي قيادت کي ساراهيندي يونيورسٽي ۾ تعليم جي معيار کي بهتر بڻائڻ ۽ تحقيقي ماحول کي وڌيڪ مضبوط ڪرڻ لاءِ سندس ڪوششن کي ساراهيو اعتماد جو اظهار ڪيو ته معياري تحقيق، مقابلي واري نوعيت جي تحقيقي منصوبن ۽ پاليسي تي ٻڌل علمي عملن تي مسلسل ڌيان ڏيڻ سان شاهه عبداللطيف يونيورسٽي جي علمي حيثيت ۽ معاشري لاءِ ان جي خدمتن کي وڌيڪ هٿي ملندي.