سکر (غلام علي رپورٽ) واڙي تڙ، آدم شاهه ڪالوني ۽ ريتي لائين جي رهواسين مردن ۽ عورتن ريلوي انتظاميا ۽ پوليس جي مبينا زيادتين، گهرن مان بي دخل ڪرڻ ۽ جاري ڪيل نوٽيسن خلاف سکر پريس ڪلب آڏو احتجاجي مظاهرو ڪيو. مظاهرين ريلوي انتظاميا خلاف سخت نعريبازي ڪندي مطالبو ڪيو ته ڊگهي عرصي کان آباد غريب خاندانن کي بي دخل ڪرڻ جو سلسلو فوري طور تي روڪيو وڃي، سندن گهرن جو تحفظ يقيني بڻايو وڃي ۽ ڪچين آبادين جي رهواسين کي قانوني ۽ مالڪي جا حق فراهم ڪيا وڃن. احتجاج ۾ مسمات وقار النساءِ، صداقت علي، مشتاق چاچڙ سميت سياسي، سماجي ۽ مذهبي اڳواڻن شرڪت ڪئي. مظاهري کي جمعيت علماءِ اسلام (ف) جي اڳواڻ قاري لياقت علي مغل، ايم ڪيو ايم جي اڳوڻي سنڌ اسيمبلي ميمبر ديوان چند چاولا، ايم ڪيو ايم پاڪستان ليگل ايڊ ڪميٽي سکر جي انچارج ايڊووڪيٽ سعيد احمد قريشي ۽ سنڌ يونائيٽيڊ پارٽي جي اڳواڻ ماجد علي ڊنور سميت ٻين خطاب ڪيو. جمعيت علماءِ اسلام جي اڳواڻ قاري لياقت علي مغل چيو ته احتجاج جو مقصد انهن غريب ۽ مظلوم خاندانن جي حق ۾ آواز بلند ڪرڻ آهي، جن لاءِ ٻن ويلن جي ماني حاصل ڪرڻ اڳ ئي ڏکيو بڻيل آهي. هن چيو ته ڪراچي کان پنجاب تائين ريلوي جي زمينن تي وڏيون عمارتون ۽ بنگلا موجود آهن، پر ڪارروائي رڳو غريب آبادين خلاف ڪئي پئي وڃي. هن دعويٰ ڪئي ته واڙي تڙ، آدم شاهه ڪالوني ۽ ايوب گيٽ جي آس پاس ڪيترائي خاندان ڪيترن ئي ڏهاڪن کان آباد آهن، اهڙي صورتحال ۾ کين اوچتو بي دخل ڪرڻ ڳڻتي جوڳو عمل آهي. قاري لياقت علي مغل چيو ته ڄاڻايل علائقن ۾ زمينن جي قيمتن ۾ واڌ سبب غريب آبادين کي هٽائڻ پٺيان مبينا طور مفاد ڪارفرما ٿي سگهن ٿا. سندس چوڻ هو ته جمعيت علماءِ اسلام متاثر خاندانن سان گڏ بيٺل آهي ۽ سندن حقن لاءِ هر فورم تي آواز اٿاريو ويندو. هن وفاقي وزير ريلوي، ريلوي ڊي ايس سکر، ايس ايس پي ريلوي، ضلعي انتظاميا ۽ ميئر سکر سميت لاڳاپيل اختيارين کان مطالبو ڪيو ته متاثر خاندانن جي مسئلن جو فوري طور حل ڪڍيو وڃي. متاثر رهواسي صداقت علي چيو ته هو واڙي تڙ، آدم شاهه ڪالوني جو رهواسي آهي ۽ کيس اوچتو گهر خالي ڪرڻ لاءِ نوٽيس ڏنو ويو. سندس چوڻ موجب رهواسين لاڳاپيل ريلوي اختيارين سان رابطو ڪيو، پر کين هڪ آفيس کان ٻي آفيس ڏانهن موڪليو ويندو رهيو ۽ ڪو به واضح جواب نه ڏنو ويو. هن الزام لڳايو ته ڪارروائي دوران سندس گهر جو دروازو ٽوڙيو ويو، جنهن سبب گهرڀاتين کي سخت پريشاني کي منهن ڏيڻو پيو. صداقت علي چيو ته متاثر خاندانن ۾ بزرگ، عورتون ۽ ٻار شامل آهن، جيڪي ڪيترن ئي سالن کان انهن علائقن ۾ رهائش پذير آهن. هن حڪومت پاڪستان، اعليٰ اختيارين ۽ لاڳاپيل انتظاميا کان مطالبو ڪيو ته متاثر خاندانن کي بي دخل ڪرڻ بدران سندن رهائشي حقن جو تحفظ ڪيو وڃي ۽ جيڪڏهن اهي علائقا ڪچي آبادي جي زمري ۾ اچن ٿا ته کين قانوني حق فراهم ڪيا وڃن. ايم ڪيو ايم جي اڳوڻي سنڌ اسيمبلي ميمبر ديوان چند چاولا احتجاج کي خطاب ڪندي چيو ته غريب خاندانن کي گهرن مان ڪڍي روڊن تي آڻڻ ڪنهن به صورت ۾ قبول ناهي. هن چيو ته جيڪڏهن ڪنهن ڪارروائي لاءِ قانوني گهرجون موجود آهن ته اهي پوريون ڪيون وڃن، پر عورتن، ٻارن ۽ بزرگن کي گهرن مان بي دخل ڪرڻ انساني ۽ سماجي لحاظ کان به ڳڻتي جوڳو آهي. هن مطالبو ڪيو ته جيڪڏهن ڪنهن اهلڪار يا آفيسر اختيارن کان تجاوز ڪيو آهي ته معاملي جي غيرجانبدارانه جاچ ڪرائي ذميوارن خلاف قانون موجب ڪارروائي ڪئي وڃي. هن متاثر ماڻهن جي گهرن جي بحالي ۽ کين قانوني تحفظ فراهم ڪرڻ تي پڻ زور ڏنو. ايم ڪيو ايم پاڪستان ليگل ايڊ ڪميٽي سکر جي انچارج ايڊووڪيٽ سعيد احمد قريشي چيو ته واڙي تڙ ۽ ڀرپاسي جي علائقن ۾ ڪچين آبادين جو معاملو نئون ناهي ۽ ماضي ۾ به انهن آبادين کي قانوني حيثيت ڏيڻ بابت مختلف سطحن تي ڪارروائي ٿيندي رهي آهي. هن دعويٰ ڪئي ته وٽس سکر جي ڪجهه ڪچين آبادين بابت پراڻا سرڪاري دستاويز موجود آهن ۽ معاملي کي قانوني ۽ آئيني طريقي سان حل ڪيو وڃي. ايڊووڪيٽ سعيد احمد قريشي الزام لڳايو ته ڪجهه هنڌن تي غريب رهواسين کان زمين خالي ڪرائڻ يا متبادل جاءِ فراهم ڪرڻ جي نالي تي مبينا طور رقم طلب ڪرڻ جون شڪايتون پڻ سامهون آيون آهن. هن چيو ته جيڪڏهن اهڙيون شڪايتون درست آهن ته انهن جي شفاف جاچ ضروري آهي. سندس چوڻ هو ته ريلوي جي زمين تي ڪارروائي هڪجهڙي ۽ قانون موجب ٿيڻ گهرجي ۽ رڳو غريب آبادين کي نشانو نه بڻايو وڃي.
هن وڌيڪ چيو ته جيڪڏهن ڪنهن…
