بدين خيرپور گمبوه ۾ آر او پلانٽ ۽ سرڪاري پلاٽ تي مبينا قبضي جو نوٽيس، بدين واٽر سپلاءِ جي ناقص صورتحال تي به سخت ڪاوڙ

بدين( ڊ رمحفوظشاه )بدين صوبائي محتسب اعليٰ جي ريجنل ڊائريڪٽر بدين ڊاڪٽر نسيم الغني سهتو درخواستگذار مسمات صوبيه خاصخيلي جي شڪايت تي خيرپور گمبوه جو دورو ڪري علائقي جي واحد آر او پلانٽ، پاڻي جي تلاءَ ۽ سرڪاري پلاٽ تي مبينا قبضي واري صورتحال جو جائزو ورتو درخواستگذار طرفان شڪايت ڪئي وئي ته عبدالمجيد ولد بادل خاصخيلي علائقي جي واحد آر او پلانٽ، پاڻي جي تلاءَ ۽ ان سان گڏ موجود سرڪاري خالي پلاٽ تي مبينا طور غيرقانوني قبضو ڪري گهر تعمير ڪيو آهي، جڏهن ته سرڪاري پلاٽ تي دڪان پڻ قائم ڪيو ويو آهي. شڪايت موجب مبينا قبضي سبب علائقي واسين جي آر او پلانٽ تائين پهچ متاثر ٿي رهي آهي، جڏهن ته آر او پلانٽ پڻ بند ڪيو ويو آهي ريجنل ڊائريڪٽر صوبائي محتسب اعليٰ بدين ڊاڪٽر نسيم الغني سهتو صورتحال تي سخت ڪاوڙ جو اظهار ڪندي اسسٽنٽ مختيارڪار ٽنڊوباگو کي هدايت ڪئي ته آر او پلانٽ ۽ سرڪاري پلاٽ تان غيرقانوني قبضو جلد کان جلد ختم ڪرايو وڃي ۽ عوام لاءِ پيئڻ جي صاف پاڻي جي سهولت بحال ڪئي وڃي. هن پوليس پوسٽ خيرپور گمبوه جي انچارج کي پڻ هدايت ڪئي ته جيڪڏهن سرڪاري پلاٽ ۽ عوام لاءِ قائم ڪيل آر او پلانٽ تان قبضو ختم نه ڪيو وڃي ته مبينا قبضو ڪندڙ خلاف قانون موجب ايف آءِ آر داخل ڪرڻ لاءِ قدم کنيا وڃن بعد ۾ ريجنل ڊائريڪٽر صوبائي محتسب اعليٰ بدين ڊاڪٽر نسيم الغني سهتو بدين باءِ پاس روڊ تي قائم واٽر سپلاءِ جو اوچتو دورو ڪري پاڻي جي تلائن ۽ ٻين انتظامن جو معائنو ڪيو. ان موقعي تي پاڻي جي تلائن جي خراب صورتحال، پاڻي جو سائي رنگ ۽ پاڻي ۾ موجود جيتن کي ڏسي هن سخت ڪاوڙ جو اظهار ڪيو ڊاڪٽر نسيم الغني سهتو چيو ته هو اڳ به بدين واٽر سپلاءِ جو دورو ڪري چڪو آهي ۽ ان وقت ميونسپل ڪميٽي بدين کي صفائي سٿرائي ۽ پاڻي ۾ ڪلورين جي مناسب استعمال سميت ضروري هدايتون جاري ڪيون ويون هيون، پر انهن هدايتن تي عملدرآمد نه ٿيڻ افسوسناڪ آهي. هن چيو ته شهرين کي گندو، بدبودار ۽ غير معياري پاڻي فراهم ڪرڻ واري معاملي تي خاموش نه ٿو رهي سگهجي ۽ عوام کي صاف ۽ محفوظ پيئڻ جو پاڻي فراهم ڪرڻ لاڳاپيل ادارن جي ذميواري آهي ريجنل ڊائريڪٽر صوبائي محتسب اعليٰ بدين گذريل دوري دوران جاري ڪيل هدايتن تي عمل نه ٿيڻ جو سخت نوٽيس وٺندي ميونسپل انتظاميا خلاف ڪارروائي جون هدايتون جاري ڪيون. هن چيو ته چيف ميونسپل آفيسر بدين کي طلب ڪيو ويو هو، پر هو حاضر نه ٿيو ڊاڪٽر نسيم الغني سهتو چيف ميونسپل آفيسر بدين کي ٻيهر 13 آڪٽوبر 2026ع تي طلب ڪري ورتو ۽ واضح ڪيو ته مقرر تاريخ تي پيش نه ٿيڻ جي صورت ۾ شوڪاز نوٽيس جاري ڪيو ويندو، جڏهن ته ان کانپوءِ به حاضري نه ڏيڻ جي صورت ۾ قانون موجب وارنٽ جاري ڪرڻ سميت وڌيڪ ڪارروائي عمل ۾ آندي ويندي.