لاڙڪاڻي شهر جي غريب مقام پاڙي جي رهواسين طرفان پاڪ ڪتاب کڻي مارڪيٽ پوليس جي مبينا ناجائزين خلاف پريس ڪلب اڳيان احتجاج

لاڙڪاڻو(رپورٽ مريد سولنگي) لاڙڪاڻي شهر جي غريب مقام پاڙي جي رهواسين طرفان پاڪ ڪتاب کڻي مارڪيٽ پوليس جي مبينا ناجائزين خلاف پريس ڪلب اڳيان احتجاج ڪيو ويو. ان موقعي تي احتجاج ڪندڙ طلاقيل عورت عصمت خاتون ملاڻو پنهنجي ڀيڻ صائمه، چاچي نصيب خاتون، پٽ ضامن علي ملاڻو ۽ ٻين سان گڏجي ميڊيا آڏو دانهيندي الزام لڳايو ته گذريل هڪ هفتي کان وٺي مارڪيٽ ٿاڻي جي پوليس بيگناھ اسان جو جيئڻ جنجال بڻائي ڇڏيو آهي، جڏهن ته تازو گذريل رات دير سان پوليس اسان جي گهر ۾ داخل ٿي گهر ۾ بيٺل 2 عدد موٽر سائيڪلون، اي سين، ٿانون، ڪپڙن سميت 25 لک روپين جي ماليت جي ٻي قيمتي سامان جي ڦرلٽ ڪئي آهي، هن وقت به پوليس پاران اسان کي ڌمڪيون ڏنيون پيون وڃن، اهڙيون شڪايتون اسان مختلف وقتن تي ايس ايس پي آفيس ۾ ڏيڻ سميت تحفظ لاءِ مقامي ڪورٽ ۾ درخواست پڻ داخل ڪرائي آهي، پر ان جي باوجود پوليس اسان کي حراسان ڪري رهي آهي، جيڪو ظلم ۽ زيادتي آهي. هن وس وارين اعليٰ اختيارين کي اپيل ڪئي ته معاملي جو نوٽيس وٺي مارڪيٽ ٿاڻي جي پوليس کان پڇاڻو ڪرڻ سان گڏ ڦرلٽ ڪيل سامان واپس ڪرائي اسان کي تحفظ فراهم ڪري انصاف ڪيو وڃي.