جيڪب آباد ۾ پاڪ فوج جي حمايت ۾ ريلي، شرڪت ڪندڙن پاران نعريبازي

جيڪب آباد (رپورٽ عامر جان)جيڪب آباد ۾ قومي امن ڪائونسل ۽ هيومن رائٽس ڪميشن براءِ بين المذاهب هم آهنگي پاڪستان جي اهتمام هيٺ پاڪ فوج جي حمايت ۾ ريلي ڪڍي وئي. ريلي حبيب چوڪ کان راشد بليدي، ڊاڪٽر اصغر ۽ ٻين اڳواڻن جي اڳواڻي ۾ ڪڍي وئي، جنهن ۾ شرڪت ڪندڙن هٿن ۾ سبز هلالي جهنڊا، بينر ۽ پلي ڪارڊ کنيل هئا. ريلي جي شرڪت ڪندڙن شهر جي مختلف رستن تان مارچ ڪيو ۽  ڊي سي چوڪ تي پهتا، جتي پاڪ فوج جي حق ۾ زوردار نعريبازي ڪئي وئي. ان موقعي تي مقررن خطاب ڪندي چيو ته پاڪ فوج ملڪ ۽ قوم جي محافظ آهي، ملڪ جي سلامتي، دفاع ۽ بقا لاءِ پاڪ فوج ۽ سيڪيورٽي ادارن جي جوانن لازوال قربانيون ڏنيون آهن. هنن چيو ته پاڪ فوج جو شمار دنيا جي طاقتور فوجن ۾ ٿئي ٿو ۽ ڪنهن به ملڪ جي دفاع لاءِ مضبوط فوج ضروري آهي. مقررن وڌيڪ چيو ته کين پاڪ فوج تي فخر آهي، جيڪا پوري قوم لاءِ اعزاز جو سبب آهي. هنن چيو ته ملڪ جو هر نوجوان ۽ ٻار پاڪ فوج سان گڏ بيٺل آهي ۽ سمورا محب وطن پاڪستاني ملڪ جي سلامتي ۽ دفاع لاءِ پنهنجي فوج سان ڪلهو ڪلهي ۾ ملائي بيٺل آهن.