”خيبر پخونخوا جي دهشتگرديءَ جا اثر ٻين علائقن تائين پکڙجڻ جو خدشو آهي“ شازيه مري خبردار ڪري ڇڏيو

اسلام آباد (ويب ڊيسڪ) پاڪستان پيپلز پارٽيءَ جي مرڪزي ترجمان شازيه مري چيو آهي ته خيبرپختونخوا ۾ دهشتگرديءَ جا لڳاتار واقعا ڳڻتيءَ جوڳا آهن، جتي هٿين خالي ۽ معصوم شهرين کي نشانو بڻايو پيو وڃي، صوبي ۾ ڪنهن جي به جان محفوظ ناهي ۽ ڪنهن به وقت ڪجهه به ٿي سگهي ٿو، جڏهن ته پشاور شهر به هاڻي غير محفوظ بڻجي ويو آهي.
پريس ڪانفرنس ڪندي شازيه مري چيو ته قبائلي علائقن کانپوءِ دهشتگرديءَ جا اثر شهري علائقن تائين پهچي چڪا آهن. قبائلي علائقن ۾ حالتون خراب ٿيڻ وقت ئي ضروري قدم کڻڻ گهرجن ها.
هن چيو ته قبائلي علائقن ۾ به ٻار، عورتون ۽ خاندان دهشتگرديءَ کان متاثر ٿيا، ماڻهن جا گهر اجڙي ويا ۽ هاڻي دهشتگرديءَ جي باهه شهرن تائين پهچي چڪي آهي.
پيپلز پارٽيءَ جي اڳواڻ پاڪستان جي ٻين علائقن تائين دهشتگرديءَ جا اثر پکڙجڻ جو خدشو ظاهر ڪندي چيو ته دهشتگرديءَ کي بهانو قرار ڏيڻ درست ناهي، ڇاڪاڻ ته اها پاڪستان جو هڪ حقيقي مسئلو آهي. پاڪستان ڪيترن ئي ڏهاڪن کان دهشتگرديءَ خلاف جنگ وڙهي رهيو آهي.
شازيه مري الزام هنيو ته گذريل 13 سالن دوران خيبرپختونخوا ۾ دهشتگرديءَ کي منهن ڏيڻ لاءِ اثرائتا قدم نه کنيا ويا.