غيرقانوني افغان شهرين جي ڪراچي منتقلي روڪڻ لاءِ قانون لاڳو ڪندر ادارا سرگرم، سهولتڪار نيٽ ورڪن خلاف ڪارروائيون تيز

ڪراچي (ويب ڊيسڪ) سنڌ حڪومت حب کان غيرقانوني طور ڪراچي آندل افغان شهرين ۽ سندن سهولتڪار نيٽ ورڪن خلاف ڪارروائيون تيز ڪري ڇڏيون آهن، جڏهن ته حڪومت ان حوالي سان زيرو ٽالرنس پاليسي اختيار ڪئي آهي.
خانگي ٽي وي چئنل سان ڳالهائيندي سنڌ حڪومت جي ترجمان نادر گبول چيو ته ڪراچي ۾ غيرقانوني طور رهندڙ افغان شهرين ۽ انهن کي سهولتون فراهم ڪندڙ نيٽ ورڪن خلاف ڪارروائيون وڌيڪ سخت ڪيون پيون وڃن.
هن چيو ته غيرقانوني ماڻهن کي شهر تائين پهچڻ کان روڪڻ لاءِ قانون لاڳو ڪندڙ ادارن، رينجرز ۽ انٽيليجنس ايجنسين جونگڏيل ڪارروائيون جاري آهن.
نادر گبول حب کان افغان شهرين کي ڪراچي منتقل ڪرڻ ۽ غيرقانوني رهائش بابت تازي ڪارروائي کي قانون لاڳو ڪندڙ ادارن جي وڏي ڪاميابي قرار ڏنو.
سندس چوڻ هو ته سنڌ حڪومت غيرقانوني پرڏيهين ۽ انهن لاءِ ڪم ڪندڙ مافياز ۽ نيٽ ورڪن خلاف زيرو ٽالرنس پاليسي اختيار ڪري رکي آهي.
هن چيو ته معاملو رڳو غيرقانوني افغان شهرين تائين محدود ناهي، پر ڪراچي ۾ کين رهائش ۽ ٻيون سهولتون فراهم ڪندڙ ماڻهن خلاف به ڪارروائي ڪئي پئي وڃي.
سنڌ حڪومت جي ترجمان موجب، افغانستان کان غيرقانوني طور ايندڙ ماڻهو مختلف ڏکين ۽ ڏورانهين رستن ذريعي بلوچستان پهچن ٿا، جتان ڪجهه ماڻهو گاڏين، ٽرانسپورٽ جي ٻين ذريعن يا مقامي ايجنٽن جي مدد سان ڪراچي پهچڻ جي ڪوشش ڪن ٿا.
ٻئي پاسي گذريل ڏينهن سنڌ رينجرز ۽ ضلعي ويسٽ پوليس ڳجهي اطلاع جي بنياد تي سرجاڻي ٽائون ۾ بين الصوبائي انساني اسمگلرن خلاف گڏيل آپريشن ڪيو، جنهن دوران پنج ڄڻن کي گرفتار ڪيو ويو.
گرفتار ٿيل جوابدارن جي سڃاڻپ عبدالعزيز بروهي، محمد بخش دشتي، علي حسن بروهي، نديم بروهي ۽ جميل بروهي طور ڪئي وئي آهي.
ترجمان موجب، اهي غيرقانوني افغان شهرين يار محمد ۽ رسول خان کي ڪراچي منتقل ڪري رهيا هئا.
ترجمان وڌيڪ ٻڌايو ته گرفتار جوابدارن وٽان هٿيارن ۽ منشيات سان گڏ غيرقانوني انساني اسمگلنگ لاءِ استعمال ٿيندڙ سوزوڪي لوڊر گاڏي به هٿ ڪئي وئي آهي.
اختيارين موجب، جوابدار انساني اسمگلنگ سان گڏ هٿيارن ۽ منشيات جي ڪاروبار ۾ به ملوث آهن.